అమెరికాలో ఆంధ్ర యువకుడి అరెస్టు

ఓహియో: అమెరికాలోని ఆంధ్ర యువకుడు అరెస్టయ్యాడు. అమెరికాలోని డెట్రాయిట్ మెట్రోపాలిటన్ విమానాశ్రయంలో భద్రతా నిబంధనలు ఉల్లంఘించాడనే ఆరోపణపై అక్కడి అధికారులు కళ్యాణ్ పాలిచెర్ల అనే 27 ఏళ్ల తెలుగు యువకుడిని అరెస్టు చేశారు. అతనిపై కోర్టు విచారణ జరుగుతోందని మెట్రో డెట్రాయిట్ విభాగంలో ఫ్రీప్ డాట్ కామ్ తెలిపింది. కళ్యాణ్ నిర్బంధంపై గురువారం ఫెడరల్ కోర్టులు విచారణ జరుగుతుంది. అప్పటి వరకు అతన్ని కస్టడీలోనే ఉంచాలని అమెరికా మెజిస్ట్రేట్ కోర్టు జడ్జి రాన్ డన్ ఆదేశించారు.

డెట్రాయిట్ మెట్రోపాలిటన్ విమానాశ్రయంలో సోమవారం నిబంధనలు ఉల్లంఘించి కళ్యాణ్ ముందుకెళ్లాడని అధికారులు తెలిపారు. అతడి వద్ద టికెట్ గానీ లగేజీ గానీ లేవు. దాంతో పోలీసులు సెక్యురిటీ గేట్లు మూసేసి, టెర్మినల్ ఖాళీ చేయాలని ఇతర ప్రయాణికులను ఆదేశించారు. టీజీఆర్ ప్రయోగించి కళ్యాణ్ ను పోలీసులు అదుపులోకి తీసుకున్నారు. ఓహియోలోని బ్రియాన్ నగరంలో కళ్యాణ్ ఉంటున్నట్లు సమాచారం. ఇతర వివరాలు తెలియవు.