వైయస్సార్ హెలికాప్టర్ క్రాష్ పై నివేదిక

హైదరాబాద్: మాజీ ముఖ్యమంత్రి వైయస్ హెలికాప్టర్ ప్రమాదంపై ప్రభుత్వం వేసిన ఖోస్లా, ఎంఆర్ రెడ్డిలతో కూడిన ద్విసభ్య కమిటీ గురువారం తన నివేదికను ముఖ్యమంత్రి కె. రోశయ్యకు సమర్పించింది. ప్రమాదానికి గల కారణాలతో, భవిష్యత్తులో ఇటువంటి ప్రమాదాలు జరగకుండా తీసుకోవాల్సిన జాగ్రత్తలతో కమిటీ పది రోజుల నివేదికను కమిటీ రోశయ్యకు సమర్పించింది. కమిటీ వివరాలను ప్రభుత్వం వెల్లడిస్తుందని ఖోస్లా, ఎంఆర్ రెడ్డి మీడియా ప్రతినిధులతో చెప్పారు. వైయస్ రాజశేఖర రెడ్డి హెలికాప్టర్ ప్రమాదానికి ప్రతికూల వాతావరణం మాత్రమే కాకుండా ఇతర కారణాలు కూడా ఉన్నాయని వారు చెప్పారు. ప్రమాదంలో కుట్ర కోణాన్ని తాము సిబిఐకే వదిలేశామని వారు చెప్పారు. అయితే కుట్ర జరిగినట్లు ఆధారాలు లేవని వారు చెప్పారు.

ప్రమాదానికి గల కారణాలను తెలుసుకోవడానికి కాక్ పిట్ వాయిస్ రికార్డరే ప్రధాన సాక్ష్యమని వారు చెప్పారు. హెలికాప్టర్ ఆ రోజు ఉదయం 9 గంటల 15 నిమిషాల దాకా సమాచారం అందిస్తూ వచ్చిందని వారు చెప్పారు. ప్రమాదానికి ముందు హెలికాప్టర్ చెట్టును ఢీకొట్టిందని వారు చెప్పారు. హెలికాప్టర్ కిందికి దిగుతున్న సమయంలో పైకి లేపడానికి పైలట్లు ప్రయత్నాలు చేశారని వారు చెప్పారు. ఇంధనం తక్కవగా ఉందన్న వాదనల్లో నిజం లేదని వారు స్పష్టం చేశారు. పైలట్లు చెన్నై, శంషాబాదులోని గెస్టులతో మాట్లాడినట్లు దాఖలాలు లేవని చెప్పారు. తాము సమగ్రంగా దర్యాప్తు చేసి నివేదిక సమర్పించినట్లు వారు తెలిపారు.