కాకాపై మాట్లాడే స్థాయి కాదు: విహెచ్

హైదరాబాద్: తమ పార్టీ సీనియర్ నేత జి వెంకటస్వామి (కాకా) వ్యాఖ్యలపై మాట్లాడే స్థాయి తనకు లేదని కాంగ్రెసు సీనియర్ నేత వి. హనుమంతరావు అన్నారు. కమిటీ వేయడం ద్వారా కాంగ్రెసు పార్టీ అధిష్టానం మోసం చేస్తోందని కాకా విమర్శించారు. ఈ వ్యాఖ్యలపై మాట్లాడేందుకు విహెచ్ నిరాకరించారు. తాను కాంగ్రెసు వర్కింగ్ కమిటీ (సిడబ్ల్యుసి) సభ్యుడినై ఉంటే మాట్లాడి ఉండేవాడినని ఆయన గురువారం మీడియా ప్రతినిధులతో అన్నారు. తెలంగాణ జోరును పెంచేందుకే కేంద్ర ప్రభుత్వం శ్రీకృష్ణ కమిటీని వేసిందని ఆయన అన్నారు.

ముఖ్యమంత్రి కె. రోశయ్యపై తమ పార్టీ శాసనసభ్యుడు ఆర్ దామోదర్ రెడ్డి దురుద్దేశంతో వ్యాఖ్యలు చేయలేదని, ప్రజల నుంచి వస్తున్న ఒత్తిడితోనే మాట్లాడారని ఆయన అన్నారు. దామోదర్ రెడ్డి ఎంత గట్టిగా మాట్లాడినా పార్టీ అధిష్టానాన్ని ధిక్కరించబోరని, కాంగ్రెసు నాయకులెవరూ అధిష్టానాన్ని ధిక్కరించబోరని ఆయన అన్నారు. హైదరాబాదులో ఐపియల్ మ్యాచులను రద్దు చేయవద్దని కోరుతూ ఆయన కేంద్ర వ్యవసాయ శాఖ మంత్రి శరద్ పవార్ కు లేఖ రాశారు.