రోశయ్యది కోతల బడ్జెట్టే: చంద్రబాబు

హైదరాబాద్: రాష్ట్ర ప్రభుత్వం గొప్పగా బడ్జెట్ ప్రతిపాదిస్తూ అమల్లో మాత్రం కోతలు పెడుతోందని ప్రతిపక్ష నాయకుడు నారా చంద్రబాబు నాయుడు వ్యాఖ్యానించారు. గవర్నర్ ప్రసంగానికి ధన్యవాదాలు తెలిపే తీర్మానంపై చర్చలో ఆయన శుక్రవారం పాల్గొన్నారు. ప్రభుత్వ తీరుపై ఆయన తీవ్రంగా విమర్సలు చేస్తూ ప్రభుత్వానికి తగిన సూచనలు చేశారు. దేశంలోని ఏ రాష్టంలోనూ లేనంతగా రాష్ట్ర ప్రభుత్వం పన్నులు వేసిందని, సామాన్యులపై భరించలేనంత భారం పడిందని ఆయన అన్నారు. ప్రభుత్వం ఆదాయ వ్యయాలపై ఆత్మపరిశీలన చేసుకోవాలని ఆయన సూచించారు. జలయజ్ఞంపై ప్రభుత్వం పునరాలోచన చేయాలని ఆయన కోరారు. జలయజ్ఞం ప్రాజెక్టుల నిర్మాణాలు తగిన విధంగా లేవని ఆయన అన్నారు. విఫలమైందని తెలిసిన ప్రభుత్వం మేఘమధనాన్ని ఎందుకు కొనసాగిస్తోందని ఆయన ప్రశ్నించారు.

మద్యం ద్వారా ప్రభుత్వం 12 వేల కోట్ల రూపాయల ఆదాయాన్ని సమకూర్చుకోవడానికి ప్రయత్నిస్తోందని, మద్యం వ్యసనాన్ని పెంచి ప్రభుత్వం ఆదాయాన్ని పెంచుకోవాలని అనుకోవడం సరి కాదని ఆయన అన్నారు. సంక్షేమ కార్యక్రమాలు అమలు జరగడం లేదని ఆయన అన్నారు. కేంద్ర నిధులకు రాష్ట్ర ప్రభుత్వ వ్యయానికి పొంతన లేదని ఆయన అన్నారు. ఆహార ధాన్యాల దిగుబడి 30 శాతం పడిపోయిందని ఆయన అన్నారు. సరుకుల ధరలపై నియంత్రణ లేదని, సబ్సిడీ ధరలకు ఇస్తామన్న సరుకులు మార్కెట్లో లభించడం లేదని ఆయన విమర్శించారు. తూర్పు గోదావరి జిల్లా అమలాపురం అధికార పార్టీ నాయకులు కల్తీ సారా తయారు చేసి పంపిణీ చేస్తున్నారని ఆయన ఆరోపించారు.