శ్రీకృష్ణ కమిటీ విధివిధానాలు మారవు: మొయిలీ

న్యూఢిల్లీ: ఆంధ్రప్రదేశ్ పరిస్థితిపై అధ్యయనానికి వేసిన జస్టిస్ శ్రీకృష్ణ కమిటీ విధివిధానాల్లో మార్పులుండవని కేంద్ర న్యాయశాఖ మంత్రి, కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ స్పష్టం చేశారు. శ్రీకృష్ణ కమిటీ విధివిధానాలపై తెలంగాణ నేతల నుంచి, ఉద్యమకారుల నుంచి తీవ్ర నిరసన వ్యక్తమవుతున్న నేపథ్యంలో ఆయన శుక్రవారం మీడియా ప్రతినిధులతో ఆ విధంగా అన్నారు. రాజీనామాలు ఉపసంహరించుకుని శ్రీకృష్ణ కమిటీకి సహకరించాలని తమ పార్టీ శాసనభ్యులు దామోదర్ రెడ్డి, ముత్యంరెడ్డిలను, ప్రజారాజ్యం పార్టీ శాసనసభ్యుడు మహేశ్వర రెడ్డిని కోరినట్లు ఆయన తెలిపారు.

ఆ ముగ్గురు శాసనసభ్యులకు తాము చెప్పాల్సింది చెప్పామని, రాజీనామాలు ఉపసంహరించుకునే విషయంపై ఇక వారిష్టమని ఆయన అన్నారు. గతంలో వాయిదా పడిన ప్రదేశ్ కాంగ్రెసు కమిటీ (పిసిసి) సమన్వయ కమిటీ సమావేశం త్వరలో జరుగుతుందని ఆయన చెప్పారు. ఉస్మానియా విశ్వవిద్యాలయం ఘటనలపై తాను మాట్లాడబోనని, ఈ అంశంపై సుప్రీంకోర్టు విచారణ జరుపుతోందని ఆయన అన్నారు.