తెలంగాణ విద్యార్థి ఆత్మాహుతి యత్నం

హైదరాబాద్: హైదరాబాదులోని ఉస్మానియా విశ్వవిద్యాలయంలో తెలంగాణ కోసం ఓ విద్యార్థి ఆత్మాహుతి యత్నానికి పాల్పడ్డాడు. విద్యార్థుల అసెంబ్లీ ముట్టడి ప్రశాంతంగా ముగిసిందని భావిస్తున్న సమయంలో ఈ ఘోర సంఘటన చోటు చేసుకుంది. దీంతో ఉస్మానియా విశ్వవిద్యాలయం గేటు తీవ్ర ఉద్రిక్తత చోటు చేసుకుంది. పోలీసు గో బ్యాక్ అంటూ విద్యార్థులు నినాదాలు చేయడం మొదలు పెట్టారు. ఉస్మానియాలోని పరిపాలన భవనం వద్ద ఒంటికి నిప్పంటించుకుని పోలీసుల వైపు దూసుకొచ్చాడు. దీంతో పోలీసులు, తోటి విద్యార్థులు మంటలనార్పారు.

ఆత్మాహుతి యత్నానికి పాల్పడిన విద్యార్థిని తిరువూరి యాదయ్యగా గుర్తించారు. అతను నోబుల్ కళాశాలలో ఇంటర్మీడియట్ రెండో సంవత్సరం చదువుతున్నాడు. తీవ్రంగా గాయపడిన యాదయ్యను సమీపంలోని ఆంధ్ర మహిళా సభ ఆస్పత్రిలో చేర్చారు. అతను ఓ లేఖ రాసి ఆత్మాహుతి యత్నం చేశాడు. తాను తెలంగాణ కోసమే ఆత్మహత్య చేసుకుంటున్నట్లు రాశాడు. ఎన్ని ఉద్యమాలు చేసినా తెలంగాణ రావడం లేదని, అందుకు నిరసనగానే తాను ఆత్మహత్య చేసుకుంటున్నానని అతను రాశాడు. అతని బ్యాగులో తెలంగాణ నాయకులతో కలిసి తీసుకున్న ఫొటోలున్నాయి. సర్టిఫికెట్లను బట్టి అతను హైదరాబాదులోని సరూర్ నగర్ కు చెందినవాడని భావిస్తున్నారు.