రెండు తలల పాము వివాదం, పోలీసులకు ప్రమోదం

జగ్గయ్యపేట: రెండు తలలపామును అమ్మజూసిన ఇరువురు వ్యక్తులను పాముతో సహా అదుపులోకి తీసుకుని స్టేషన్‌కు తరలించారు. రెండు తలల పాము కోసం బేరసారాలు సాగిస్తున్న ఇరువురు వ్యక్తులను జగ్గయ్యపేట పోలీసులు శనివారం రాత్రి అదుపులోకి తీసుకున్నారు. వివరాలిలా ఉన్నాయి. వత్సవాయి మండలం, పెదమోదుగపల్లికి చెందిన రైతులు కళ్లేపల్లి భద్రయ్య, కల్యాణం రామకృష్ణకు పొలంలో రెండు తలలపాము లభ్యమైంది. దీనికి మార్కెట్‌లో మంచి డిమాండ్‌ ఉందని తెలిసి కొనుగోలు చేసేందుకు వచ్చిన వ్యక్తులతో రాత్రి పట్టణ సమీపంలోని హైవే పక్కగా ఉన్న వెంకటేశ్వర రెస్టారెంట్‌లో బేరసారాలు కొనసాగిస్తున్నారు.

రైతులు రూ.లక్ష డిమాండ్‌ చేయగా, కొనుగోలుదారులు రూ.75 వేలు చెల్లిస్తామని చెప్పారు. వీరి మధ్య సంభాషణ కొనసాగుతుండగా, పెదమోదుగుపల్లికి చెందిన కొందరు రైతులు జగ్గయ్యపేట పోలీసులకు సమాచారం అందించారు. వెంటనే స్పందించిన పోలీసులు హుటాహుటిన అక్కడకు చేరుకున్నారు. పోలీసుల రాకను పసిగట్టిన కొనుగోలుదారులు పరారవగా, పామును అమ్మజూసిన ఇరువురు వ్యక్తులను పాముతో సహా అదుపులోకి తీసుకుని స్టేషన్‌కు తరలించారు.