ప్రణబ్ బడ్జెట్ మేడిపండు: చంద్రబాబు

హైదరాబాద్: కేంద్ర ఆర్థిక మంత్రి ప్రణబ్ ముఖర్జీ ప్రతిపాదించిన బడ్జెట్ పై తెలుగుదేశం పార్టీ అధినేత నారా చంద్రబాబు నాయుడు తీవ్ర విమర్శలు చేశారు. బడ్జెట్ పైకి బాగా కనిపిస్తూ లోన చూస్తే ప్రజావ్యతిరేకమైందిగా ఉందని ఆయన శుక్రవారం మీడియా ప్రతినిధుల సమావేశంలో అన్నారు. బడ్జెట్ లోపల ఏమీ లేదని ఆయన అన్నారు. బడ్జెట్ రూపకల్పనలో నూతనత్వం, సృజనాత్మకత కొరవడిందని ఆయన వ్యాఖ్యానించారు. ఆర్థిక వ్యవస్థ నిర్వహణలో యుపిఎ ప్రభుత్వం విఫలమైందని ఆయన అన్నారు. ఆహార ధాన్యాల దిగుబడి సరైంది కాదని ఆయన అన్నారు. విద్యుత్తరంగానికి తగిన ప్రాధాన్యం ఇవ్వలేదని ఆయన అన్నారు. పెట్రోల్, డీజిల్ ధరలు పెంచడాన్ని ఆయన వ్యతిరేకించారు. ధరల నియంత్రణకు ఆలోచన చేస్తున్న దాఖలు లేదన్నారు. బడ్జెట్ వల్ల పేదవానికి ఒరిగిందేమీ లేదని ఆయన అన్నారు.

ప్రణబ్ ప్రతిపాదించిన బడ్జెట్ పై ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ హర్షం వ్యక్తం చేశారు. రైతులకు అనుకూలంగా ప్రణబ్ బడ్జెట్ ఉందని ఆయన మీడియా ప్రతినిధుల సమావేశంలో అన్నారు. వ్యవసాయానికి, దాని అనుబంధ కార్యకలపాలకు ప్రాధాన్యం ఇవ్వడం పట్ల ఆయన ప్రశంసించారు. ప్రణబ్ ముఖర్జీ బడ్జెట్ అగ్నికి ఆజ్యం పోసేదిగా ఉందని సిపిఐ రాష్ట కార్యదర్శి కె. నారాయణ అన్నారు. ప్రణబ్ బడ్జెట్ పై సిపిఎం రాష్ట్ర కార్యదర్సి బివి రాఘవులు కూడా తీవ్ర అసంతృప్తి వ్యక్తం చేశారు.