క్వారీ వద్ద కలెక్టర్, ఎస్పీ పర్యవేక్షణ

ఒంగోలు: గని పై భాగపు రాళ్ళు, మట్టి విరిగిపడిన చీమకుర్తిలోని హంస గ్రానైట్‌ క్వారీ వద్ద సహాయక చర్యలు కొనసాగుతున్నాయి. శిథిలాల నుంచి ముగ్గురిని సహాయక సిబ్బంది రక్షించారు. వీటి కింద మరికొంత మంది ఉన్నట్లు అంచనాకు వచ్చిన అధికారులు సహాయక చర్యలను ముమ్మరం చేశారు. కొండచరియలను తొలగించేందుకు భారీ క్రేన్లు వెళ్లేందుకు వీలుగా ఘటనా స్థలి వద్ద రోడ్డు నిర్మిస్తున్నారు. శిథిలాల్లో చిన్న చిన్న భాగాలను తొలగించేందుకు మూడు పొక్లెయిన్లను వినియోగిస్తున్నారు. జిల్లా కలెక్టర్‌ కాంతిలాల్‌దండే, ఎస్పీ నవీన్‌చంద్‌ సహాయక చర్యలను పర్యవేక్షిస్తున్నారు.

కొండచరియలను పూర్తిగా తొలగించేందుకు రెండు రోజుల సమయం పడుతుందని భావిస్తున్నారు. చీమకుర్తి గ్రానైట్‌ క్వారీలో గురువారం సాయంత్రం 200 అడుగుల నుంచి కొండ చరియలు విరిగిపడ్డాయి. ఈ ఘటనలో 20 మంది సజీవ సమాధి అయినట్లు భావిస్తున్నారు. ఇప్పటివరకూ ఇద్దరు కార్మికుల మృతదేహాలను వెలికితీశారు. గాయపడిన వారికి చికిత్స చేయిస్తున్నారు.