'నక్సలైట్ ముద్రతో ఉద్యమాన్ని అణచలేరు'

శాయంపేట: తెలంగాణ ఉద్యమంలోకి నక్సలైట్లు చొరబడ్డారని దుష్ప్రచారం చేస్తూ ప్రభుత్వం ఉద్యమాన్ని నీరుగార్చాలని చూస్తుందని, ఎన్ని కుట్రలు పన్నినా తెలంగాణ ఉద్యమాన్ని అణచలేరని హుజురాబాద్‌ మాజీ ఎమ్మెల్యే, టీఆర్‌ఎస్‌ పొలిట్‌ బ్యూరో సభ్యులు ఈటెల రాజేందర్‌ అన్నారు. గురువారం మండలంలోని మాందారిపేట గ్రామంలో మామునూరి సందీప్‌ సంతాప సభలో ఆయన మాట్లాడుతూ ఉస్మానియా యూనివర్సిటీలో నక్సలైట్లు చొరబడ్డారంటూ ప్రభుత్వం తప్పుడు నివేదికలు రూపొందించడం సరికాదన్నారు.

విద్యార్థులు, అడ్వకేట్లపై పోలీసులు లాఠీచార్జ్‌ చేయడం అమానుషమన్నారు. ఆంధ్ర పోలీసుల దెబ్బలను చూసి ప్రజలు చలించిపోతున్నారని తెలిపారు. ఆంధ్ర ప్రాంతంలో కాలువలు ద్వారా నీళ్లు పుష్కలంగా పారుతుంటే, తెలంగాణ లో నీళ్లు లేక బావులు, బోర్లపై ఆధార పడాల్సిన దుస్థితి ఏర్పడిందన్నారు. ఇంకెంత కాలం మన నీళ్లు, మన ఉద్యోగాలు ఆంధ్ర పాలకులు దోచుకుతింటారని ఆయన ప్రశ్నించారు.