క్వారీ ఘటనపై న్యాయవిచారణ: చిరు డిమాండ్

ఒంగోలు: ప్రకాశం జిల్లా చీమకుర్తి హంస గ్రానైట్ ఘటనపై న్యాయవిచారణ జరిపించాలని ప్రజారాజ్యం పార్టీ అధినేత చిరంజీవి డిమాండ్ చేశారు. ఆయన శనివారం హంస గ్రానైట్ ప్రమాద స్థలాన్ని సందర్శించారు. క్వారీ ప్రమాదం గురించి, సహాయ చర్యల గురించి ఆయన రాష్ట్ర గనుల మంత్రి బాలినేని శ్రీనివాస రెడ్డిని అడిగి తెలుసుకున్నారు. ఆ తర్వాత చిరంజీవి మీడియా ప్రతినిధులతో మాట్లాడారు. యాజమాన్యం ధనదాహం వల్లనే ప్రమాదం సంభవించిందని ఆయన విమర్శించారు. ఇటువంటి సంఘటనలు పునరావృతం కాకుండా చర్యలు తీసుకోవాలని ఆయన ప్రభుత్వాన్ని కోరారు.

చీమకుర్తి హంస గ్రానైట్ ప్రమాదంలో 12 మంది మరణించినట్లు అధికార వర్గాలు చెబుతున్నారు. శిథిలాల నుంచి ఇప్పటి వరకు మూడు మృతదేహాలను వెలికి తీశారు. శుక్రవారం రెండు మృతదేహాలను వెలికి తీయగా, శనివారం మరో మృతదేహాన్ని వెలికి తీశారు. అయితే శిథిలాల కింద అధికార వర్గాలు చెప్పినట్లుగా 12 మంది మాత్రమే లేరని, 20 మంది దాకా ఉంటారని భావిస్తున్నారు. మస్టర్ లేని కూలీలు పది మంది దాకా పనిచేస్తున్నట్లు చెబుతున్నారు.