రోశయ్యతో దయాకర్ రావు భేటీ

హైదరాబాద్: తెలుగుదేశం పార్టీ శాసనసభ్యుడు ఎర్రబెల్లి దయాకర రావు సోమవారం ముఖ్యమంత్రి కె రోశయ్యను కలుసుకున్నారు. తన పాలకుర్తి నియోజకవర్గంలో పంట నష్టపోయిన రైతులను ఆదుకోవాలని తాను ముఖ్యమంత్రిని కోరినట్లు ఆయన ఆనంతరం మీడియా ప్రతినిధులతో చెప్పారు. అందుకు ముఖ్యమంత్రి సానుకూలంగా ప్రతిస్పందించినట్లు ఆయన తెలిపారు. వరంగల్ జిల్లాలో అర్హులైన రైతులకు కాకుండా భూములు లేనవారికి చెక్కులు అందాయని ఆయన చెప్పారు. తన నియోజకవర్గంలో జరిగిన నష్టాన్ని ముఖ్యమంత్రికి వివరించినట్లు ఆయన తెలిపారు.

భూములు లేనివారికి చెక్కుల ఇచ్చిన విషయంపై ఆధారాలను, ఇతర ఆధారాలను తాను ముఖ్యమంత్రికి అందజేసినట్లు ఆయన తెలిపారు. అవకతవకలపై విచారణ జరిపించాలని తాను ముఖ్యమంత్రి రోశయ్యను కోరినట్లు ఆయన తెలిపారు. శాసనసభ ఉప ఎన్నికల్లో తమ పార్టీ పోటీ చేసే విషయంపై అదిష్టానమే నిర్ణయం తీసుకుంటుందని ఆయన చెప్పారు. రాష్ట్ర విభజనపై మంత్రి బొత్స సత్యనారాయణ వ్యాఖ్యలను తాను సమర్థిస్తున్నట్లు ఆయన తెలిపారు.