వచ్చే హోలీ తెలంగాణలోనే: పోన్నం

కరీంనగర్: వచ్చే ఏడాది హోలీ పండుగను తెలంగాణ రాష్ట్రంలోనే చేసుకుంటామని కాంగ్రెసు పార్లమెంటు సభ్యుడు పొన్నం ప్రభాకర్ అన్నారు. కరీంనగర్ లో సోమవారం హోలీ పండుగ వైభవంగా జరిగింది. ఈ వేడుకల్లో ఆయన పాల్గొన్నారు. తెలంగాణ రాష్ట్రం ఏర్పడి తీరుతుందని, ఇందులో సందేహం అవసరం లేదని ఆయన మీడియా ప్రతినిధులతో అన్నారు.

రాష్ట్ర విభజన మంచిదేనని పంచాయతీరాజ్ మంత్రి బొత్స సత్యనారాయణ చేసిన వ్యాఖ్యను ఆయన సమర్థించారు. బొత్స వ్యాఖ్యలకు సీమాంధ్ర నేతలు ఎందుకు ఉలిక్కిపడుతున్నారో చెప్పాలని ఆయన అన్నారు. ఇప్పటికైనా సీమాంధ్ర నేతలకు కనువిప్పు కలగాలని, తెలంగాణ రాష్ట్ర ఏర్పాటుకు సహకరించాలని ఆయన అన్నారు.