సెక్స్ స్కాం: నిత్యానంద స్వామిపై 420 కేసు

చెన్నై: ఒక తమిళ నటితో ఆధ్యాత్మిక గురువు నిత్యానంద స్వామి రాసలీలల్లో మునిగి తేలుతున్నట్లు ఓ తమిళ చానల్‌ ప్రసారం చేయడం రాష్ట్రంలో పెను దూమారం రేపింది. ఈ వ్యవహా రంతో స్వామీజీ చిక్కుల్లోపడే పరిస్థితి నెలకొంది. ఆయనపై వివిధ సెక్షన్ల కింది పోలీసులు ఉచ్చు బిగిస్తున్నారు. నిత్యానందంకు వ్యతిరేకంగా గురువారమూ రాష్ట్రంలో పలుచోట్ల ఆందోళనలు, దాడులు జరిగాయి. కోయంబత్తూర్‌, చెన్నైలో ఫిర్యాదులు వెల్లువెత్తాయి. చెన్నైలో న్యాయవాదులు రజనీ, రామ శివశంకర్‌, ఖయల్‌, శివ పెరుమాల్‌, లింగన్‌ వేర్వేరుగా ఇచ్చిన ఫిర్యాదు మేరకు నిత్యానందంపై కేసు నమోదు చేశారు. ఆయనపై సెక్షన్‌ 420 కింద కేసు నమోదు చేసినట్లు కమిషనర్‌ రాజేంద్రన్‌ పేర్కొన్నారు. ఆయ న్ను అరెస్ట్‌ చేయడానికి న్యాయ నిపుణులతో చర్చిస్తున్నామన్నారు. నిత్యానందం విదేశాలకు పారిపోకుండా తగు జాగ్రత్తలు తీసుకున్నట్లు తెలిపారు. రంజితపైనా చర్యలు తీసుకోవాలంటూ ఫిర్యాదు రావడంతో దాన్ని కూడా పోలీసులు పరిగణలోకి తీసుకున్నారు.

విచారణ ఆధారంగా రంజితపైనా చర్య తీసుకునేందుకు నిర్ణయించారు. నిత్యానందం, రంజితలు అజ్ఞాతంలో ఉండడంతో గాలింపు నిమిత్తం సెంట్రల్‌ క్రైం బ్రాంచ్‌ పోలీసుల నేతృత్వంలో ప్రత్యేక బృందాన్ని రంగంలోకి దించారు. కోయంబత్తూర్‌ లోనూ ఇదే తరహాలో పోలీసులు కేసులు నమోదు చేస్తుండడంతో నిత్యానందం మెడ కు మరింత ఉచ్చు బిగుస్తోంది. దీంతో అప్రమత్తమైన ధ్యాన పీఠం ప్రతినిధులు చెన్నై సిటీ సివిల్‌ కోర్టును ఆశ్రయించారు. ఆ అశ్లీల సీడీలో కన్పిస్తున్న వ్యక్తి నిత్యానందం కాదని, హైటెక్నాలజీని ఉపయోగించి మాఫింగ్‌ చేశారని, అందుకే ఆ ప్రసారాలను నిలుపుదల చేయాలని విన్నవించారు. ఆ మేరకు ప్రసారాలను నిలిపి వేయాలని న్యాయస్థానం ఆదేశాలు జారీ చేసింది. ఈ నేపథ్యంలో నిత్యానందం ఆధ్యాత్మిక పీఠం పీఆర్‌ఓ నిత్యాత్మ ప్రభానంద, నిత్యానందం న్యాయవాది శ్రీధర్‌ సరికొత్త చర్చను తెరపైకి తీసుకొచ్చారు. పాత కక్షతోనే సన్‌ నెట్‌ వర్క్‌ పదే పదే ఆ సీడీని ప్రసారం చేస్తోందని విలేకరుల సమావేశంలో ఆరోపించారు.