హెచ్సార్సీకి మావోల ఎన్ కౌంటర్లపై నివేదికలు

హైదరాబాద్: మావోయిస్టు నేతలు శాఖమూరి అప్పారావు, కొండల రెడ్డిల ఎన్ కౌంటర్లపై ప్రకాశం, వరంగల్ జిల్లాల ఎస్పీలు సోమవారం మానవ హక్కుల కమిషన్ (హెచ్చార్సీ)కి నివేదికలు సమర్పించారు. అప్పారావు, కొండల రెడ్డి ఎన్ కౌంటర్లలోనే మరణించారని వారు తమ తమ నివేదికల్లో స్పష్టం చేశారు. ఫొరెన్సిక్ నిపుణులు పోస్టుమార్టం చేశారని వారు తెలిపారు. కొండల్ రెడ్డి భార్య మాధవి జోషి కూడా మావోయిస్టేనని, తన భర్త మృతదేహాన్ని అప్పగించాలని కోరలేదని వరంగల్ జిల్లా పోలీసులు తెలిపారు.

నివేదికలు సమగ్రంగా లేవని, దీనిపై కౌంటర్ దాఖలు చేస్తామని న్యాయవాది జయ వింధ్యాల చెప్పారు. ఎన్ కౌంటర్లపై విచారణను మానవ హక్కుల కమిషన్ వచ్చేనెల 22వే తేదీకి వాయిదా వేసింది. ప్రకాశం జిల్లా ఎన్ కౌంటర్లో శాఖమూరి అప్పారావు, వరంగల్ జిల్లా ఎన్ కౌంటర్లో కొండల రెడ్డి మరణించిన విషయం తెలిసిందే.