కాంగ్రెసు, టిడిపిల మధ్య ఫిక్సింగ్ లేదు: గాలి

హైదరాబాద్: తెలుగుదేశం, కాంగ్రెసు పార్టీల మధ్య మ్యాచ్ ఫిక్సింగ్ జరిగిందంటూ వస్తున్న వార్తల్లో నిజం లేదని తెలుగుదేశం శాసనసభ్యులు గాలి ముద్దు కృష్ణమనాయుడు, మోత్కుపల్లి నర్సింహులు స్పష్టం చేశారు. బిఎసి సమావేశానంతరం వారిద్దరు సోమవారం మీడియా ప్రతినిధులతో మాట్లాడారు. శాసనసభలో తమ పార్టీ నిర్మాత్మక ప్రతిపక్ష పాత్రను పోషిస్తోందని వారు చెప్పుకున్నారు.

తమ పార్టీలో విభేదాలు లేవని కూడా వారు స్పష్టం చేశారు. మరో ఐదు రోజులు మాత్రమే శాసనసభా సమావేశాలున్నాయని, దీంతో సభా సమయం వృధా కాకుండా ప్రభుత్వానికి సూచనలు చేశామని వారు చెప్పారు. ఉపాధి హామీ పథకంలో అక్రమాలపై తెలుగుదేశం సభ్యులు పట్టుబట్టడంతో సభ అర గంటపాటు వాయిదా పడింది. దీంతో బిఎసి సమావేశం ఏర్పాటు చేయాలని తెలుగుదేశం సభ్యులు స్పీకర్ కిరణ్ కుమార్ రెడ్డిని కోరారు. ఆ మేరకు స్పీకర్ బిఎసి సమావేశం ఏర్పాటు చేశారు.