ఆంధ్రజ్యోతి ఆఫీసులపై పిఆర్పీ దాడులు

హైదరాబాద్: హైదరాబాదులోని ఎబిఎన్ చానెల్ - ఆంధ్రజ్యోతి పత్రిక కార్యాలయంపై ప్రజారాజ్యం పార్టీ కార్యకర్తలు సోమవారం దాడి చేశారు. తమ పార్టీకి, తమ పార్టీ అధ్యక్షుడు చిరంజీవికి వ్యతిరేకంగా కథనాలు వచ్చినందుకు ఆగ్రహించిన కార్యకర్తలు ఈ దాడికి పాల్పడ్డారు. విశాఖపట్నంలోని ఎబిఎన్ - ఆంధ్రజ్యోతి కార్యాలయంపై కూడా ప్రజారాజ్యం పార్టీ కార్యకర్తలు దాడి చేశారు. హైదరాబాదులోని ఆంధ్రజ్యోతి కార్యాలయం అద్దాలు పగిలాయి. చిరంజీవి ప్రజారాజ్యం పార్టీకి వ్యతిరేకంగా వార్తాకథనాలు ప్రసారం చేసినందుకే తాము దాడి చేసినట్లు వారు తెలిపారు. ఈ దాడులను ప్రజారాజ్యం పార్టీ కార్యకర్తలు సమర్థించుకున్నారు.

నిరసన తెలపడానికి వెళ్లిన తమ పార్టీ కార్యకర్తలపై ఎబిఎన్ - ఆంధ్రజ్యోతి సిబ్బంది, జర్నలిస్టులు దాడికి ప్రయత్నించారని, ఈ సమయంలో తోపులాట జరిగిందని ప్రజారాజ్యం పార్టీ శాసనసభ్యులు అన్నారు. కన్నబాబు, సత్యానంద్, వంగా గీత తదితర శాననసభ్యులు సోమవారం శాసనసభ ఆవరణలోని మీడియా పాయింట్ వద్ద మీడియా ప్రతినిధులతో మాట్లాడారు. తమ పార్టీని అప్రతిష్టపాలు చేయడానికి ఆంధ్రజ్యోతి యాజమాన్యం రెండు రోజులుగా వార్తాకథనాలను ప్రచురిస్తోందని వారు విమర్శించారు. తమ ఏజెంటుగా నడుచుకోవాలనే దురుద్దేశంతోనే తమకు వ్యతిరేకంగా వార్తాకథనాలు ప్రసారం చేస్తోందని వారన్నారు. ఆంధ్రజ్యోతి తీరు వల్లనే ఆ సంస్థ కార్యాలయంపై గతంలో కూడా దాడులు జరిగాయని వారన్నారు.