తూలి పడబోయిన సిఎం రోశయ్య

హైదరాబాద్: ముఖ్యమంత్రి కె. రోశయ్య సోమవారం శాసనసభ ఆవరణలో తూలి పడబోయారు. స్వల్ప అస్వస్థత కారణంగానే ఇలా జరిగినట్లు భావిస్తున్నారు. శానససభ నుంచి ఆయన శాసన మండలికి వెళ్లే సమయంలో బయట గేటు తలకు తగిలింది. దాంతో తూలి కింద పడబోయారు. అయితే భద్రతా సిబ్బంది అప్రమత్తమై ముఖ్యమంత్రిని పట్టుకున్నారు. ఆ తర్వాత తేరుకున్న ఆయన శాసన మండలికి వెళ్లారు. తాను తూలిపడిపోవడంపై ముఖ్యమంత్రి రోశయ్య స్పందించారు. శాసనసభ నుంచి బయటకు రాగానే కళ్లు తిరిగినట్లు అనిపించిందని, ఒక్క నిమిషం ఆగి ఉంటే సరిపోయేదని ఆయన అన్నారు.

ముఖ్యమంత్రి రోశయ్య సోమవారం ఉదయమే ముఖ్యమంత్రి క్యాంపు కార్యాలయంలోకి అడుగు పెట్టారు. ముఖ్యమంత్రిగా పదవీ బాధ్యతలు చేపట్టిన ఏడు నెలల తర్వాత ఆయన అందుకు ఉపక్రమించారు. దివంగత ముఖ్యమంత్రి వైయస్ రాజశేఖర రెడ్డి మరణం తర్వాత చాలా కాలం ఆయన కుమారుడు వైయస్ జగన్ ముఖ్యమంత్రి కార్యాలయంలోనే ఉన్నారు. తెలంగాణ ఉద్యమం నేపథ్యంలో కొన్ని విమర్శలు రావడంతో ఆయన తన మకాం మార్చారు. దీంతో రోశయ్య ముఖ్యమంత్రి కార్యాలయంలోకి అడుగు పెట్టడానికి అవకాశం చిక్కింది.