మావోల చర్య: పట్టాలు తప్పిన రాజధాని

పాట్నా, భువనేశ్వర్: భువనేశ్వర్ - న్యూ ఢిల్లీ రాజధాని ఎక్స్ ప్రెస్ రైలు సోమవారం అర్థరాత్రి బీహారులోని కాస్తా - పరైయాల మద్య పట్టాలు తప్పింది. రాజధాని ఎక్స్ ప్రెస్ ఇంజన్ సహా ఏడు బోగీలు పట్టాలు తప్పాయి. మావోయిస్టులు పేలుడుకు పాల్పడడం వల్ల ఈ ప్రమాదం సంభవించినట్లు అనుమానిస్తున్నారు. ఈ ఘటనలో ప్రాణ నష్టం సంభవించలేదు. ప్రయాణికులెవరూ గాయపడలేదు. గయ రైల్వే స్టేషన్ కు 15 కిలోమీటర్ల దూరంలో ఈ ఘటన జరిగింది. గయ స్టేషన్ నుంచి రైలు బయలు దేరిన కొద్దిసేపటికే ప్రమాదం సంభవించింది.

మావోయిస్టులు 48 గంటల పాటు ఇచ్చిన బంద్ పిలుపు నేపథ్యంలోనే ఈ ప్రమాదం చోటు చేసుకున్నట్లు భావిస్తున్నారు. రాజధాని రైలు పట్టాలు తప్పిన ఘటన వల్ల పలు ముఖ్యమైన రైళ్ల రాకపోకలకు అంతరాయం ఏర్పడింది. 42 రైళ్ల రాకపోకలపై ప్రభావం పడింది. కాగా, మావోయిస్టులు ఒరిస్సాలో తాజాగా మావోయిస్టులు విధ్వంసానికి పాల్పడ్డారు. ఒరిస్సాలోని రూర్కెలా వద్ద రెండు రైల్వే ట్రాక్ లను మావోయిస్టులు పేల్చేశారు. దీంతో హౌరా - ముంబై మధ్య రైళ్ల రాకపోకలపై ప్రభావం పడింది.