మీడియాపై దాడులు సహించం: సిఎం

హైదరాబాద్: మీడియాపై దాడులను సహించబోమని ముఖ్యమంత్రి కె రోశయ్య అన్నారు. మీడియాపై దాడులను ప్రభుత్వం చూస్తూ ఊరుకోదని ఆయన మంగళవారం మీడియా ప్రతినిధుల సమావేశంలో అన్నారు. మీడియా స్వేచ్ఛను కాపాడేందుకు ప్రభుత్వం చిత్తశుద్దితో పనిచేస్తుందని ఆయన హామీ ఇచ్చారు. మీడియాపై దాడుల నిరోధానికి ఏర్పాటైన కమిటీలను పునర్వ్యస్థీకరిస్తామని ఆయన చెప్పారు. మీడియాకు స్వీయ నియంత్రణ అవసరమని ఆయన అభిప్రాయపడ్డారు. వార్తలను ప్రజలకు చేరవేయడానికి ముందు సమాచారాన్ని సక్రమంగా తనిఖీ చేసుకోవాలని ఆయన సూచించారు.

శాసనసభ సమావేశాల తర్వాత తాను ఢిల్లీ వెళ్తానని ఆయన చెప్పారు. పార్టీ అధ్యక్షురాలు సోనియా గాంధీ, ప్రధాని మన్మోహన్ సింగ్ లను కలిసి పార్టీ, ప్రభుత్వ విషయాల గురించి చర్చిస్తానని ఆయన చెప్పారు. పోలవరం ప్రాజెక్టుకు జాతీయ హోదా కల్పించే విషయంపై కేంద్ర ప్రభుత్వం సూత్రప్రాయంగా అంగీకారం తెలిపినట్లు ఆయన చెప్పారు. రాష్ట్రంలోని మిగతా ప్రాజెక్టులు, పథకాలకు నిధులు తదితర విషయాలపై కూడా ఢిల్లీలో తాను మాట్లాడనున్నట్లు ఆయన తెలిపారు.