దంతేవాడు నరమేథం: సూత్రధారి ఎవరు?

రాయపూర్: నక్సలైట్ ఉద్యమంలో అతి పెద్ద దాడి చత్తీస్ ఘడ్ లోని దంతెవాడ జిల్లాలో జరిగింది. ప్రభుత్వం వైపు ఇంత ప్రాణ నష్టం జరిగిన నక్సలైట్ దాడి ఇప్పటి వరకు లేదనే చెప్పవచ్చు. దాదాపు వేయి మంది మావోయిస్టులు విరుచుకుపడి, మందుపాతర పేల్చి 73 మంది సిఆర్పీఎఫ్ జవాన్లను హతమార్చారు. ఒక పథకం ప్రకారం ఈ దాడి జరిగిందని చత్తీస్ ఘడ్ డిజిపి విశ్వరంజన్ అన్నారు. ఆ దాడికి ప్రణాళిక రచించి, అమలు చేసిన మావోయిస్టు నేత ఆంధ్రప్రదేశ్ కు చెందిన కటికం సుదర్శన్ అనే ఊహాగానాలు చెలరేగుతున్నాయి.

ఆంధ్రప్రదేశ్ కు చెందిన కటికం సుదర్శన్ అలియాస్ ఆనంద్, అలియాస్ మోహన్ అలియాస్ ఎఎన్ అలియాస్ బీరేంద్రజీ సిపిఐ (మావోయిస్టు) కేంద్ర కమిటీ సభ్యుడు. 53 ఏళ్ల అతన్ని హింసకు పురిగొల్పే వ్యక్తి కన్నా బోధకుడిగానే ఎక్కువగా చూస్తారని అంటారు. గత 30 ఏళ్లుగా నక్సలైట్ ఉద్యమంలో ఉన్న ఇతనికి వ్యూహకర్తగా పేరుంది. అతను ఆదిలాబాద్ జిల్లా బెల్లంపల్లిలోని చేనేత కుటుంబానికి చెందినవాడు. వరంగల్ లో పాలిటెక్నిక్ చదువుతూ నక్సలైట్ ఉద్యమంలోకి వెళ్లాడు.

సుదర్శన్ మావోయిస్టు కేంద్ర కమిటీలో శక్తివంతమైన నాయకుడు. కేంద్ర ప్రాంతీయ బ్యూరోకు అధిపతి అని చెప్తారు. దీని పరిధిలోకి ఆంధ్ర - ఒరిస్సా సరిహద్దు, ఉత్తర తెలంగాణ జోన్లు, దండకారణ్య ప్రాంత (చత్తీస్ గడ్) వస్తాయి. సుదర్శన్ వ్యూహం రచించి ఆమోదం తెలుపుతాడని, ఎప్పుడు కూడా దాడిలో పాల్గొనడని విశ్లేషకులు చెప్తారు. దంతేవాడ దాడి వెనక కూడా పని చేసింది ఆయనేనని ప్రచారం జరుగుతోంది.