సామ్రాట్ దహాల్ తో మనీషా కొయిరాల పెళ్లి

ఖాట్మండ్: బాలీవుడ్ నటి మనీషా కొయిరాల నేపాల్ వాణిజ్య వేత్త సామ్రాట్ దహాల్ ను వివాహం చేసుకోవడానికి నిర్ణయించుకుంది. మనీషా కోయిరాల, సామ్రాట్ దహాల్ ల వివాహం జూన్ 19వ తేదీన జరుగుతుందని సామ్రాట్ దహాల్ తండ్రి సురేంద్ర దహాల్ చెప్పారు. ఆయన లెదర్ వింగ్స్ వ్యాపారం చెన్నై, న్యూఢిల్లీ, కాన్పూర్, ఆగ్రాలకు కూడా విస్తరించింది.

అమెరికాలో చదువుకున్న సామ్రాట్ సొంతంగా బయో గ్యాస్ ప్లాంట్ స్థాపించడానికి నేపాల్ వచ్చాడు. తొలి ప్లాంట్ పర్యాటక నగరం పోఖారాలో ఏర్పాటవుతుంది. మనీషా కొయిరాల నటిస్తున్న నేపాలీ చిత్రం ధర్మ షూటింగ్ అక్కడే జరుగుతుంది. తెలుగు చిత్రం షూటింగ్ నిమిత్తం ప్రస్తుతం కేరళలో ఉన్న మనీషా శుక్రవారం అక్కడికి చేరుకుంటుంది. సామ్రాట్ మనీషా కొయిరాలతో నిత్యం ఫోన్ లో మాట్లాడుతున్నట్లు సమాచారం. ఖాట్మండ్, ముంబై, న్యూయార్క్ ఎక్కడ ఉంటారనేది వారు నిర్ణయం తీసుకుంటారని సురేంద్ర అంటున్నారు.