విశాఖ సెంట్రల్ వర్సిటీ ఖాయం: పురంధేశ్వరి

విశాఖపట్నం: విశాఖ సమీపంలోని సబ్బవరంలో సేకరించిన 700 ఎకరాల్లో 'ఇన్నోవేటివ్' యూనివర్సిటీ ఏర్పాటు చేస్తామన్నారు. ఈ యూనివర్సిటీ ఎక్కడికో తరలిపోతోందన్న ఆరోపణలు ఆవాస్తవమని ఆమె చెప్పారు. దేశవ్యాప్తంగా మొత్తం ఇలాంటివి 14 వస్తాయన్నారు. అయితే వాటిలో విద్యా విధానం, పరీక్షలు, పరిశోధనలు, ప్రొఫెసర్ల నియామకం, ఇ-లెర్నింగ్ వంటి అంశాలపై నిర్ణయం తీసుకోవలసి వున్నదని చెప్పారు. విదేశీ విశ్వవిద్యాలయాల పోటీని తట్టుకుని నిలబడే విధంగా వీటిని తీర్చిదిద్దుతామన్నారు. ఇందుకు కొంచెం సమయం పట్టే అవకాశం వుందని పేర్కొన్నారు.

విశాఖపట్నం విమానాశ్రయంలో 12 గంటలకు మాత్రమే పరిమితమైన సేవలను 24 గంటలకు పెంచాలని రక్షణ శాఖ మంత్రి ఆంటోనీని కోరినట్టు పురందేశ్వరి చెప్పారు. రైలు, విమాన సర్వీసుల వంటి మౌలిక వసతులపై ప్రధాని మంత్రి మన్మోహన్ సింగ్‌తో మాట్లాడినపుడు విశాఖలో అంతర్జాతీయ విమానాశ్రయం ఏర్పాటుకు తూర్పు నౌకాదళం అధికారులు కల్పిస్తున్న అడ్డంకుల గురించి కూడా వివరించానన్నారు.