నెత్తురోడిన రోడ్లు: పది మంది మృతి

హైదరాబాద్: రాష్ట్రంలో శనివారం మూడు జిల్లాల్లో రోడ్లు నెత్తురోడాయి. మూడు జిల్లాల్లో జరిగిన వేర్వేరు రోడ్డు ప్రమాదాల్లో పది మంది మృత్యువాత పడ్డారు మోర 21 మంది గాయపడ్డారు. నల్లగొండ జిల్లా నార్కెట్ పల్లి మండలం ఎల్లారెడ్డిగూడెం వద్ద జరిగిన రోడ్డు ప్రమాదంలో ఐదుగురు మరణించారు. మరో 12 మంది గాయపడ్డారు. గాయపడినవారిని ఆస్పత్రికి తరలించారు. ప్రయాణికులతో వస్తున్న ఆటోను లారీ ఢీకొట్టడంతో ఈ ప్రమాదం సంభవించింది. మృతులు మహబూబ్ నగర్ జిల్లా చారకొండ గ్రామవాసులు. చెరువుగట్టు ఆలయానికి వెళ్లి తిరిగి వస్తుండగా ఈ ప్రమాదం సంభవించింది.

కాగా, నెల్లూరు జిల్లా తడ మండలం కొండూరు గ్రామం వద్ద జరిగిన రోడ్డు ప్రమాదంలో ఇద్దరు మరణించారు. కారును ప్రైవేట్ బస్సు ఢీకొనడంతో ఈ ప్రమాదం సంభవించింది. ఈ ప్రమాదంలో మరో ముగ్గురు గాయపడ్డారు. ఖమ్మం జిల్లా తిరుమలాయపాలెం వద్ద జరిగిన రోడ్డు ప్రమాదంలో ముగ్గురు మరణించారు. ఎదురెదురుగా వస్తున్న మినీ వ్యాన్, లారీ ఢీకొనడంతో ఈ ప్రమాదం సంభవించింది.