ఎంపిలో ఆంధ్ర యువ శాస్త్రవేత్త ఆత్మహత్య

శ్రీకాకుళం: సీనియర్ అధికారి వేధింపులు భరించలేక ఆంధ్రప్రదేశ్ కు చెందిన తిరుమల ప్రసాద్ (28) అనే యువ శాస్త్రవేత్త మధ్యప్రదేశ్ లో ఆత్మహత్య చేసుకున్నాడు. ఈ విషయాన్ని మధ్యప్రదేశ్ పోలీసులు చెప్పారు. శనివారం రాత్రి ఇండోర్ లోని రాజేంద్ర నగర్ వద్ద గల తన అద్దె ఇంటిలో ఉరి వేసుకుని అతను ఆత్మహత్య చేసుకున్నాడు. ఇతను శ్రీకాకుళం జిల్లా సోంపేటకు చెందినవాడు. రాజా రామన్న సెంటర్ ఫర్ అడ్వాన్స్ డ్ టెక్నాలజీ (ఆర్ఆర్సిఎటి)లోని అణుశక్తి విభాగంలో ఆయన ఐదేళ్లుగా శాస్త్రవేత్తగా పనిచేస్తున్నారు.

సీనియర్ అధికారి జిఎన్ లోధా తనను మానసికంగా వేధిస్తున్నాడని రాసి ఉన్న స్యూసైడ్ నోట్ పోలీసులు సంఘటనా స్థలం నుంచి స్వాధీనం చేసుకున్నారు. లోధాపై కేసు నమోదు చేసినట్లు నగర పోలీసు అధికారి గిరీష్ సుఖేదార్ తెలిపారు. తిరుమల ప్రసాద్ మృతిపై సహ శాస్త్రవేత్తలు తీవ్ర దిగ్భ్రాంతి వ్యక్తం చేశారు. చరుకైన శాస్త్రవేత్తను తాము కోల్పోయామని ఆర్ ఆర్ సిఎటి డైరెక్టర్ పిడి గుప్తా చెప్పారు. ఈ కేసు విచారణలో పోలీసులకు పూర్తి సహకారం అందిస్తామని చెప్పారు.