కడప ముఠాకక్షలకు మరో వ్యక్తి బలి

కడప: కడప జిల్లాలో మరో సారి ముఠా కక్షలు పడగ విప్పాయి. ఈ ముఠా కక్షలకు సోమవారం మరో వ్యక్తి బలయ్యాడు. కడప జిల్లా కొండాపురం మండలం డొంకుపల్లి గ్రామంలో కేశవ రెడ్డి అనే వ్యక్తిని ప్రత్యర్థులు హత్య చేశారు. నాలుగు రోజుల క్రితం కొండాపురంలో వీరయ్య అనే వ్యక్తిని ప్రత్యర్థులు కొడవళ్లతో నరికి చంపారు. ఇంతలోనే ఈ మండలం మరో హత్య చోటు చేసుకుంది. ఈ మండలంలో గత మూడు నెలలుగా నాలుగు ఫాక్షన్ హత్యలు జరిగాయి.

కేశవ రెడ్డిని ప్రత్యర్థులు సోమవారం ఉదయం ట్రాక్టర్ తో గుద్ది హత్య చేశారు. కేశవ రెడ్డి పొలం వద్దకు వెళ్తుండగా ప్రత్యర్థులు ఈ దారుణానికి ఒడి గట్టారు. కేసును దర్యాప్తు చేస్తున్నామని, నిందితులను గుర్తించే ప్రయత్నం చేస్తున్నామని పోలీసులు అంటున్నారు.