ఢిల్లీ యాత్ర ఎంతో సంతోషంగా ఉంది: సిఎం

హైదరాబాద్: ఢిల్లీ పర్యటన ఈసారి ఎంతో ఆనందాన్ని ఇచ్చిందని ముఖ్యమంత్రి కె. రోశయ్య చెప్పారు. తాను గతంలో మంత్రిగా, ముఖ్యమంత్రిగా ఢిల్లీకి వెళ్లి వచ్చానని, కానీ గతంలో ఎన్నడూ లేనంత సంతోషం ఈసారి కలిగిందని ఆయన శనివారం మీడియా ప్రతినిధుల సమావేశంలో అన్నారు. రాష్ట్రానికి ఇతోధికంగా ప్రయోజనం చేకూరే పనులు చాలా జరిగాయని, కేంద్ర ప్రభుత్వం ఎంతో ఉదారంగా రాష్ట్రం పట్ల వ్యవహరించిందని ఆయన అన్నారు. తనతో పాటు పార్లమెంటు సభ్యులు, రాష్ట్రానికి చెందిన కేంద్ర మంత్రులు వివిధ కేంద్ర మంత్రుల వద్దకు వచ్చి రాష్ట్రానికి వివిధ సహాయాలు అంది వచ్చేలా చూశారని ఆయన అన్నారు. రాష్ట్ర వార్షిక ప్రణాళిక ఆమోదం విషయంలో ప్రణాళిక సంఘం ఉపాధ్యక్షుడు మాంటెక్ సింగ్ అహ్లూవాలియా ఉదారంగా వ్యవహరించారని ఆయన అన్నారు. రాష్ట్రానికి చెందిన వివిధ శాఖలు బాగా పనిచేస్తున్నాయని ఆహ్లూవాలియా అభినందించినట్లు ఆయన తెలిపారు.

శాసనసభ బడ్జెట్ సమావేశాలు సజావుగా జరగడం పట్ల తమ కాంగ్రెసు పార్టీ అధ్యక్షురాలు సోనియా గాంధీ తనను అభినందించినట్లు ఆయన తెలిపారు. హైదరాబాద్ అల్లర్ల విషయంలో తాము తీసుకున్న చర్యలను, రాజకీయ పార్టీలు సహకరించిన తీరును సోనియాకు వివరించినట్లు ఆయన తెలిపారు. ఈ విషయంలో కూడా సోనియా అభినందించినట్లు ఆయన తెలిపారు. రాష్ట్రంలో కొత్తగా 15 జాతీయ రహదారులకు చెందిన ప్రతిపాదనలను పరిశీలిస్తామని కేంద్ర మంత్రి కమల్నాథ్ హామీ ఇచ్చినట్లు ఆయన తెలిపారు. ప్రాణహిత - చేవెళ్ల ప్రాజెక్టుకు కేంద్ర ప్రభుత్వం సూత్రప్రాయంగా అంగీకరించినట్లు ఆయన తెలిపారు. సోనియా, మన్మోహన్ ల సహకారంతోనే రాష్ట్ర సాగునీటి ప్రాజెక్టులకు సహాయం అందుతోందని ఆయన అన్నారు. రాష్టానికి 15 లక్షల గ్యాస్ కనెక్షన్లు ఇవ్వడానికి కేంద్రం అనుమతించిందని ఆయన చెప్పారు.
హైదరాబాదులోని రెండు, రంగారెడ్డిలోని ఒక ఎమ్మెల్సీ స్థానాలకు జరిగే ఎన్నికలపై కూడా పార్టీ అధిష్టానానికి చెందిన నాయకులతో చర్చించినట్లు ఆయన తెలిపారు. మజ్లీస్ తో ఉన్న ఒప్పందం మేరకు హైదరాబాదులో ఒక స్థానాన్ని ఆ పార్టీకి ఇస్తామని, మిగతా రెండు స్థానాలకు తమ పార్టీ పోటీ చేస్తుందని ఆయన చెప్పారు. ఈ రెండు స్థానాలకు కూడా సాయంత్రంలోగా అభ్యర్థులు ఖరారవుతారని ఆయన చెప్పారు.