హైదరాబాద్ లో వైయస్ స్మారక పార్కు

హైదరాబాద్: హైదరాబాదులోని ఐమాక్స్ థియేటర్ వద్ద 20 ఎకరాల్లో వైయస్సార్ స్మారక పార్కును ఏర్పాటు చేయనున్నట్లు మున్సిపల్ శాఖ మంత్రి ఆనం రామనారాయణ రెడ్డి చెప్పారు. సెప్టెంబర్ 2వ తేదీన వైయస్సార్ స్మృతి వనం పనులు ప్రారంభిస్తామని ఆయన శనివారం మీడియా ప్రతినిధులతో చెప్పారు. పావురాల గుట్ట వద్ద ప్రైవేట్ భూములను సేకరించి వైయస్సార్ స్మృతి వనాన్ని ఏర్పాటు చేయనున్నట్లు ఆయన తెలిపారు.

కడప జిల్లా ఇడుపులపాయలోని 6.7 హెక్టార్లలో స్మారక చిహ్నం ఏర్పాటుకు కూడా ప్రభుత్వం నిర్ణయం తీసుకున్నట్లు ఆయన తెలిపారు. ఈ మూడు ప్రాజెక్టుల్లో రెండింటి నిర్మాణ పనులు సెప్టెంబర్ 2న ప్రారంభమవుతాయని ఆయన చెప్పారు. ఐదు సంస్థలతో డిజైన్లు రూపొందించినట్లు ఆయన చెప్పారు.