రోశయ్యది రద్దుల ప్రభుత్వం: బాబు

హైదరాబాద్: ముఖ్యమంత్రి రోశయ్యది రద్దుల ప్రభుత్వమని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. రైతుల సమస్యలను తెలుసుకునేందుకు నల్లగొండ జిల్లా మిర్యాలగుడాకు బయలుదేరే ముందు ఆయన గురువారం మీడియా ప్రతినిధులతో మాట్లాడారు. ఎన్నికలకు ముందు ఇచ్చిన హామీలను కాంగ్రెసు ప్రభుత్వం విస్మరిస్తోందని ఆయన విమర్శించారు. సంక్షేమ పథకాలను ఒక్కొక్కదాన్నే రోశయ్య ప్రభుత్వం రద్దు చేస్తోందని ఆయన అన్నారు. అన్ని రంగాల్లో రోశయ్య ప్రభుత్వం విఫలమైందని ఆయన అన్నారు. రాష్ట్ర ప్రభుత్వం దివాళా తీసిందని ఆయన అన్నారు.

రైతులను కాంగ్రెసు ప్రభుత్వం నిలువునా ముంచుతోందని ఆయన విమర్శించారు. రైతు సంక్షేమాన్ని నిర్లక్ష్యం చేసిందని వ్యాఖ్యానించారు. కాంగ్రెసు ఆరేళ్ల పాలనలో కాంగ్రెసు నేతలు అవినీతి, అక్రమాలతో బాగుపడ్డారని, ప్రజలు చితికిపోయారని ఆయన అన్నారు. రైతు పండించిన పంటకు మద్దతు ధర కల్పించేందుకు పోరాటం చేస్తామని ఆయన చెప్పారు. మన రాష్ట్రంలో ఉన్నంత అవినీతి దేశంలోని మరే రాష్ట్రంలోనూ లేదని ఆయన అన్నారు. కాంగ్రెసు కుక్కలు చింపిన విస్తరిలా ఉందని ఆయన వ్యాఖ్యానించారు.