వైయస్ జగన్ పై హైకమాండ్ గరం: షోకాజ్ నోటీసుకు సిద్ధం

న్యూఢిల్లీ: తమ మాట వినకుండా వరంగల్ జిల్లా ఓదార్పు యాత్రకు పూనుకుని పరిస్థితి విషమించడానికి కారణమైన తమ పార్టీ పార్లమెంటు సభ్యుడు వైయస్ జగన్మోహన్ రెడ్డిపై కాంగ్రెసు అధిష్టానం మండిపడుతోంది. రాష్ట్ర పరిస్థితులపై అధిష్టానం ఆరా తీస్తోంది. కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ రంగంలోకి దిగి పరిస్థితులపై అంచనాకు వచ్చేందుకు ప్రయత్నిస్తున్నారు. జగన్ కు షోకాజ్ నోటీసు ఇచ్చేందుకు పార్టీ అధిష్టానం సమాయత్తమవుతున్నట్లు సమాచారం.

వరంగల్ జిల్లా ఉద్రిక్తంగా మారి, పోలీసు కాల్పుల్లో ముగ్గురు మరణించడానికి వైయస్ జగనే కారణమని పార్టీ అధిష్టానం భావిస్తున్నట్లు సమాచారం. జగన్ పైనే కాకుండా ఆయన అనుచరులపై కూడా పార్టీ అధిష్టానం కొరడా ఝళిపించే అవకాశం ఉన్నట్లు తెలుస్తోంది. మరోసారి రాష్ట్రంలో పరిస్థితి విషమించడానికి జగన్ చర్యనే కారణమని కాంగ్రెసు తెలంగాణ నాయకులు భావిస్తున్నారు. కాంగ్రెసు తెలంగాణ నాయకులు జగన్ పై తీవ్రంగా మండిపడుతున్నారు.