అధిష్టానంపై ధిక్కారానికే వైయస్ జగన్ మొగ్గు

హైదరాబాద్: కాంగ్రెస్ కడప పార్లమెంటు సభ్యుడు వైయస్ జగన్మోహన్ రెడ్డి పార్టీ అధిష్టానంపై ధిక్కారానికే మొగ్గు చూపుతున్న సూచనలు కనిపిస్తున్నాయి. ముఖ్యమంత్రి కె. రోశయ్యపై ఆయన ప్రత్యక్ష విమర్శలు చేయడం, ఓదార్పు యాత్ర కొనసాగుతుందని చెప్పడం అందుకు నిదర్శనంగా చెబుతున్నారు. వరంగల్ జిల్లా మహబూబాబాద్ ఘటనకు రోశయ్య వైఫల్యమే కారణమని ఆయన న్యూఢిల్లీలో సోమవారం సాయంత్రం విమర్శించారు. ఓదార్పు యాత్రను ఆపాలని కాంగ్రెసు సీనియర్ నేత, కేంద్ర మంత్రి ప్రణబ్ ముఖర్జీ చెప్పినప్పటికీ ఆయన వెనక్కి తగ్గలేదు. దీన్ని బట్టి ఆయన జగడానికే సిద్ధపడినట్లు తెలుస్తోంది.

కాగా, జగన్ పై కాంగ్రెసు అధిష్టానం వేచి చూసే ధోరణి అవలంబిస్తున్నట్లు తెలుస్తోంది. కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ ఇచ్చే నివేదికపై జగన్ పై తీసుకునే చర్య ఆధారపడి ఉంటుందని ఎఐసిసి అధికార ప్రతినిధి జయంతీ నటరాజన్ సోమవారం సాయంత్రం మీడియా ప్రతినిధులతో చెప్పారు. అయితే జగన్ మాత్రం వెనక్కి తగ్దే సూచనలు కనిపించడం లేదు. ప్రణబ్ ముఖర్జీ ప్రకటన ఒక రకంగా హెచ్చరిక లాంటిదే. ఆయినా ఆయన ఓదార్పు యాత్ర కొనసాగుతుందని చెప్పడాన్ని అధిష్టానం ధిక్కారంగానే పరిగణిస్తుందని అంటున్నారు.