బావ చంద్రబాబుకు నందమూరి హరికృష్ణ షాక్

హైదరాబాద్: తెలుగుదేశం పార్టీ అధ్యక్షుడు, బావ నారా చంద్రబాబు నాయుడికి ఆ పార్టీ రాజ్యసభ సభ్యుడు హరికృష్ణ షాక్ ఇచ్చారు. రాజ్యసభ ఎన్నికల అభ్యర్థుల ఎంపికపై అనుసరిస్తున్న వైఖరిని ఆయన తప్పు పట్టారు. రాజ్యసభ అభ్యర్థుల ఎంపికలో సంపన్నులను పక్కన పెట్టాలని ఆయన చంద్రబాబుకు సూచించారు. పార్టీ కోసం సుదీర్ఘ కాలంగా కష్టపడి చేస్తున్నవారికి రాజ్యసభ టికెట్లు ఇవ్వాలని కూడా ఆయన అన్నారు.

మీడియా ప్రతినిధుల వద్ద హరికృష్ణ ఆ వ్యాఖ్యలు చేయడం పార్టీలో సంచలనం సృష్టించింది. పార్టీలో దీనిపై చర్చ జరుగుతోంది. వరంగల్ జిల్లాకు చెందిన గరికపాటి రామ్మోహన్ పేరును రాజ్యసభ అభ్యర్థిగా ఎంపిక చేశారని వార్తలు వెలువడిన నేపథ్యంలో పార్టీలో తీవ్ర వివాదం చెలరేగుతోంది. పార్టీ టికెట్ కోసం పోటీ పెరిగింది. దీంతో గరికపాటి రామ్మోహన్ హరికృష్ణను కలిశారు. ఈ స్థితిలో హరికృష్ణ ఆ వ్యాఖ్యలు చేశారు.