పోలవరంపై కాంగ్రెసులో తెలంగాణ, సీమాంధ్ర మంటలు

హైదరాబాద్‌: పోలవరం ప్రాజెక్టుపై తమ పార్టీ తెలంగాణ సీనియర్ నేతలపై సీమాంధ్ర నాయకులు విభేదించారు. ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ తో కాంగ్రెసు సీమాంధ్ర నాయకులు శుక్రవారం ఉదయం సమావేశమయ్యారు. ఆ తర్వాత సీమాంధ్ర శాసనసభ్యులు శైలజానాథ్, ఏరాసు ప్రతాపరెడ్డి మీడియా ప్రతినిధులతో మాట్లాడారు. పోలవరం ప్రాజెక్టుపై రెండో అభిప్రాయానికి తావు లేదని, ప్రాజెక్టును నిర్మించాలనేది ప్రజల అభిమతమని వారన్నారు. తమ పార్టీ తెలంగాణ నాయకులు గవర్నర్ కు కలవడం పద్ధతి కాదని వారన్నారు. పోలవరం వల్ల ముంపునకు గురయ్యే ప్రాంతాల్లో కూడా తమకే ఎక్కువ సీట్లు వచ్చాయని వారు చెప్పారు.

శ్రీకృష్ణ కమిటీ వచ్చే నెల 5.6,7 తేదీల్లో తమకు సమయం ఇచ్చిందని, శ్రీకృష్ణ కమిటీ వద్దకు అందరం కలిసే వెళ్తామని, అయితే వాదనలు మాత్రం వేర్వేరుగా వినిపిస్తామని వారు చెప్పారు. శ్రీకృష్ణ కమిటీ ముందు వినిపించే వాదనలపై తాము డి. శ్రీనివాస్ తో చర్చించలేదని వారు చెప్పారు. తెలంగాణలో జరిగే ఉప ఎన్నికల్లో తమ సహకారం కావాలంటే అందిస్తామని వారు చెప్పారు.