అమెరికన్ల దాడిలో ఇండియన్ శాస్త్రవేత్త మృతి

వాషింగ్టన్: అమెరికాలో టీనేజర్ల దాడిలో గాయపడిన భారత కంప్యూటర్ సైంటిస్టు దివ్యేందు సిన్హా (49) సోమవారం మరణించారు. దాడికి పాల్పడిన ముగ్గురు అమెరికన్లను పోలీసులు అదుపులోకి తీసుకున్నారు. వారిపై హత్యానేరం మోపారు. సిమెన్స్ సంస్థలో కన్సల్టెంటుగా పనిచేస్తున్న సిన్హాపై న్యూజెర్సీలో శుక్రవారం దాడి జరిగింది. తన ఇద్దరు కుమారులతో కలిసి ఓల్డ్ బ్ర్జిడ్జి సమీపంలోని ఇంటికి వెళ్తుండగా సిన్హాపై ముగ్గురు అమెరికన్లు దాడి చేశారు.

నిందితులు జాతి వివక్షతో దాడికి పాల్పడలేదని దర్యాప్తులో తేలింది. పూర్తి దర్యాప్తు తర్వాతే పోలీసులు ఆ విషయాన్ని నిర్ధారిస్తారని న్యాయవాది బ్రూస్ కాప్లాన్ చెప్పారు. భారత్ లోని ఖరగ్ పూర్ నుంచి ఐఐటి పూర్తి చేసిన తర్వాత సిన్హా హబన్ లోని స్టీవెన్స్ ఇనిస్టిట్యూట్ ఆఫ్ టెక్నాలజీ నుంచి డాక్టరేట్ తీసుకున్నాడు. కంప్యూటర్ సైన్స్ పై సిన్హా పలు పుస్తకాలు రాశాడు. ఆయన స్మృత్యర్థం బుధవారం ఓ కార్యక్రమం జరుగుతోంది.