ఆనం వివేకానంద రెడ్డితో చిరంజీవి భేటీ మతలబు?

నెల్లూరు: ప్రజారాజ్యం పార్టీ అధ్యక్షుడు చిరంజీవి కాంగ్రెసు నెల్లూరు రూరల్ శాసనసభ్యుడు ఆనం వివేకానంద రెడ్డితో మంతనాలు జరిపారు. చిరంజీవి కాంగ్రెసుకు దగ్గరవుతున్న స్థితిలో ఈ మంతనాలకు రాజకీయ ప్రాధాన్యం ఉందని భావిస్తున్నారు. సోమవారం చిరంజీవి కార్యకర్తల సమావేశానంతరం రంగనాయక స్వామిని దర్శించుకున్నారు. ఈ సమయంలోనే ఆనం వివేకానంద రెడ్డి, నెల్లూరు మేయర్ భానుశ్రీ తదితరులు ఆలయానికి వచ్చారు. వారిని చూసి చిరంజీవి ఆనం వివేకానంద రెడ్డిని పలకరించారు. ఆనం కూడా చిరును పలకరించారు. ఇరువురు ఆలింగనం చేసుకున్నారు.

ఆ తర్వాత వారిద్దరు రహస్యంగా మంతనాలు జరిపారు. దానికి తోడు చిరును భానుశ్రీ పట్టువస్త్రాలతో సత్కరించారు. చిరుతో ఆనం వివేకానంద రెడ్డి చర్చలు జరపడాన్ని ప్రజారాజ్యం పార్టీ నాయకుడు ఆనం వెంకట రమణారెడ్డి తప్పు పట్టారు. జలయజ్ఞంలో అవినీతి చోటు చేసుకుందని చిరంజీవి విమర్శించారు. ప్రాజెక్టుల అమలులో జాప్యానికి నిరసనగా చిరంజీవి పెన్నా వారధి వద్ద ధర్నా చేశారు. పెన్నా నదిలో చిరంజీవి షికారు చేశారు.