ప్రకాశం జిల్లాలో సెప్టెంబర్ 3 నుంచి వైయస్ జగన్ ఓదార్పు

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ తదుపరి ఓదార్పు యాత్ర రూట్ మ్యాప్ ఖరారైంది. సెప్టెంబర్ 3వ తేదీ నుంచి ఈ యాత్ర ప్రకాశం జిల్లాలోని గిద్దలూరు నుంచి ప్రారంభమవుతుంది. ఆదివారం రాత్రి కాంగ్రెసు నాయకుడు వైవీ సుబ్బా రెడ్డి నివాసంలో జరిగిన సమావేశంలో జగన్ ఓదార్పు యాత్రను ఖరారు చేశారు. సెప్టెంబర్ 2వ తేదీన తిరుపతిలో జరిగే వైయస్ సంస్మరణలో పాల్గొన్న అనంతరం ఆయన పులివెందులకు వెళ్తారు. 3వ తేదీన అక్కడి నుంచి గిద్దలూరు వెళ్లి అక్కడి నుంచి తన ఓదార్పు యాత్రను ప్రారంభిస్తారు.

ప్రకాశం జిల్లాలో ఆయన ఓదార్పు యాత్ర వారం రోజుల పాటు జరుగుతుంది. ఆ తర్వాత నెల్లూరు జిల్లాలోకి ప్రవేశిస్తుంది. ప్రకాశం జిల్లాలో జగన్ 12 శాసనసభా నియోజకవర్గాల్లో పర్యటిస్తారు. గిద్దలూరు, కనిగిరి, పొదిలి, మార్కాపురం, యర్రగొండ పాలెం, త్రిపురాంతకం, దర్శి, అద్దంకి, పర్చూరు, చీరాల, వేటపాలెం, నాగులుప్పలపాడు, పేర్నమిట్ట, ఒంగోలు, కొత్తపట్నం, టంగుటూరు, శింగరాయకొండల మీదుగా జగన్ యాత్ర సాగుతుంది.