వైయస్ జగన్ ఓదార్పుకు వెళ్లకుంటేనే మంచిది: దానం నాగేందర్

హైదరాబాద్: కాంగ్రెసు పార్టీ అధిష్టానం ఆదేశాలకు కట్టుబడి కడప పార్లమెంటు సభ్యుడు వైయస్ జగన్ ఓదార్పునకు వెళ్లకుంటేనే మంచిదని రాష్ట్ర ఆరోగ్య శాఖ మంత్రి దానం నాగేందర్ హితవు పలికారు. పార్టీ అధిష్టానానికి కట్టుబడి ఉంటే పార్టీకే కాకుండా వ్యక్తిగతంగా కూడా నాయకులకు మంచిదని ఆయన సోమవారం మీడియా ప్రతినిధుల సమావేశంలో అన్నారు. పార్టీ సోనియా నాయకత్వంలో నడుస్తోందని, అందువల్ల ఏ పదవిలో ఉన్నవారైనా సోనియా మాటకు కట్టుబడి నడుచుకుంటే మంచిదని ఆయన అన్నారు. సోనియా నిర్దేశం ప్రకారం నడుచుకుంటే అందరికీ మంచిదని ఆయన అన్నారు.

తెలుగుదేశం పార్టీ శవం లాంటిదని ఆయన వ్యాఖ్యానించారు. తెలుగుదేశం పార్టీ నాయకులకు సిగ్గు, లజ్జ లేదని ఆయన అన్నారు. ముఖ్యమంత్రి కె. రోశయ్య ప్రభుత్వాన్ని విమర్శించే నైతిక హక్కు ఆ పార్టీకి లేదని ఆయన వ్యాఖ్యానించారు. తెలుగుదేశం పార్టీ వారి పాపాలు కడగడానికే సమయం సరిపోవడం లేదని ఆయన అన్నారు. రోశయ్య ప్రభుత్వాన్ని కూల్చడానికి ప్రయత్నిస్తున్నవారే ఎటూ కాకుండా పోతారని ఆయన వ్యాఖ్యానించారు.