భూమన కరుణాకర్ రెడ్డి నిరాహార దీక్ష భగ్నం

తిరుపతి: తనపై వచ్చిన ఆరోపణల మీద సిబిఐ విచారణ జరిపించాలని డిమాండ్ చేస్తూ చేస్తున్న తిరుమల తిరుపతి దేవస్థానం (టిటిడి) మాజీ చైర్మన్ భూమన కరుణాకర్ రెడ్డి నిరాహార దీక్షను పోలీసులు భగ్నం చేశారు. మంగళవారం తెల్లవారు జామున నాలుగున్నర గంటల ప్రాంతలో ఆయన నిరాహార దీక్షను పోలీసులు భగ్నం చేసి, ఆయనను రుయా ఆస్పత్రిలో చేర్చారు. ఆయన ఆరోగ్యం క్షీణించడంతో పోలీసులు ఆ చర్యకు దిగారు.

కరుణాకర్ రెడ్డి శరీరంలో చక్కెర శాతం పడిపోయింది. బిపి సాధారణ స్థాయి కన్నా తక్కువ ఉంది. వైద్యులు పరీక్షించిన తర్వాత పోలీసులు ఆయనను రుయా ఆస్పత్రికి తరలించారు. పోలీసులు తన దీక్షా శిబిరాన్ని భగ్నం చేశారు గానీ తన దీక్షను భగ్నం చేయలేదని కరుణాకర్ రెడ్డి వ్యాఖ్యానించారు. తన ప్రాణాల కన్నా తనకు భగవంతుడి ఆలయమే ముఖ్యమని ఆయన అన్నారు. తనపై వచ్చిన ఆరోపణల మీద విచారణ జరిపించాల్సిందేనని ఆయన అన్నారు.