గ్రూప్ వన్ పరీక్ష వాయిదాను కోరుతున్న తెలంగాణ మంత్రులు

హైదరాబాద్‌: ప్రస్తుత పరిస్థితుల్లో గ్రూప్‌1 పరీక్ష వాయిదా వేయడమే మేలని తెలంగాణ ప్రాంత మంత్రులు అభిప్రాయపడుతున్నారు. విద్యార్థి ఐకాస, విపక్షాలు రేపటి బంద్‌కు పిలుపునిచ్చిన నేపథ్యంలో అవాంఛనీయ సంఘటనలు జరిగితే ఇబ్బందులు ఎదురవుతాయని మంత్రులు శ్రీథర్‌బాబు, డీకే అరుణ, కోమటిరెడ్డి వెంటకరెడ్డి, సునీతా లక్ష్మారెడ్డి ఆందోళన వ్యక్తం చేస్తున్నారు. ఈ విషయమై వారు ఈ సాయంత్రం ముఖ్యమంత్రిని కలిసే అవకాశాలున్నాయి.

గ్రూప్‌ 1 పరీక్ష వాయిదా వేయాలని కాంగ్రెస్‌ సీనియర్‌ నేత జి. వెంకటస్వామి ముఖ్యమంత్రి రోశయ్యకు సూచించారు. ఢిల్లీ నుంచి ఫోన్‌లో కాకా రోశయ్యతో మాట్లాడారు. విద్యార్థులు చేస్తున్న ఆందోళనల నేపథ్యంలో వాయిదా నిర్ణయం తీసుకోవాల్సిందిగా ఆయన ముఖ్యమంత్రిని కోరినట్లు సమాచారం. గ్రూప్ వన్ పరీక్షను వాయిదా వేయాలని కాంగ్రెసు పార్లమెంటు సభ్యుడు మధు యాష్కీ కూడా కోరారు. తెలంగాణవారికి అన్యాయం జరుగుతోందని ఆయన అన్నారు.