హైకోర్టు వద్ద తెలంగాణ జాగృతి అధ్యక్షురాలు కవితను అడ్డుకున్న పోలీసులు

హైదరాబాద్: హైకోర్టు వద్ద న్యాయవాదులు చేపట్టిన నిరసనకు మద్దతు తెలిపేందుకు వచ్చిన తెలంగాణ జాగృతి అధ్యక్షురాలు కవితను పోలీసులు కోర్టు గేటు వద్దనే అడ్డుకున్నారు. న్యాయవాదులను కలిసి సంఘీభావం తెలిపేందుకు కవిత వెళ్లారు. కానీ పోలీసులు గేటు వద్దనే ఆమెను అడ్డుకొని లోపలకి వెళ్లడానికి అనుమతి నిరాకరించారు. దాంతో ఆమె కాసేపు బయటే ఉండి పోయారు. ఆంధ్ర న్యాయవాదులు సైతం తెలంగాణకు అన్యాయం జరుగుతోందని, 42 శాతం వాటా రావాల్సిందేనని చెబుతున్నప్పటికీ ప్రభుత్వం వారి మాటలను సైతం బేఖాతరు చేస్తోందని ఆమె విలేకరుల సమావేశంలో వాపోయారు.

హైకోర్టులో మా వాటా మాకు వచ్చేంత వరకు న్యాయ పోరాటం చేస్తామని ఆమె ప్రకటించారు. లోపల ఒక బ్లాక్ పూర్తిగా స్తంభించి పోయిందని, మిగతా కోర్టు అంతా అదే పరిస్థితికి వస్తుందన్నారు. ప్రభుత్వం న్యాయవాదులకు ఇచ్చిన హామీలను నెరవేర్చక తప్పదని పేర్కొన్నారు. డిమాండ్లు నెరవేరే వరకు పోరాటం ఆపేది లేదన్నారు. లోపల ధర్నాలో న్యాయవాదుల ఆరోగ్యం క్షీణిస్తోందని, అందులో మహిళలు సైతం ఉన్నారన్నారు.

కాగా ధర్నా సందర్భంగా న్యాయవాదులు కోర్టుకు తాళాలు వేశారు. నాంపల్లి, సికిందరాబాద్ కోర్టులనుండి న్యాయవాదులు భారీగా హైకోర్టుకు తరలి వచ్చారు. కోర్టుకు తాళం వేయడంతో కొందరు గేట్లు దూకి నిరాహార దీక్ష చేస్తున్న న్యాయవాదులకు సంఘీభావం తెలపడానికి వెళ్లారు. దీంతో అక్కడ అంతా ఉద్రిక్త వాతావరణం నెలకొంది.