హెరిటేజ్ ఆస్తులను తెలంగాణ ప్రజలు అడుగతలేరు: తెరాస

హైదరాబాద్: తెలంగాణలోని 4 కోట్ల ప్రజలు తెలంగాణ రాష్ట్రం అడుగుతున్నారే గాని తెలుగుదేశం పార్టీ అధ్యక్షుడు నారా చంద్రబాబు నాయుడికి చెందిన హెరిటేజ్ ఆస్తులు అడగడం లేదని తెలంగాణ రాష్ట్ర సమితి (తెరాస) నాయకులు జగదీశ్వర్ రెడ్డి, శ్రవణ్ కుమార్ అన్నారు. తమ పార్టీ అధ్యక్షుడు కె. చంద్రశేఖర రావుపై విమర్శలు చేసిన చంద్రబాబుపై, తెలుదేశం తెలంగాణ నాయకులు నాగం జనార్దన్ రెడ్డి, దేవేందర్ గౌడ్ లపై వారు శనివారం మీడియా ప్రతినిధుల సమావేశంలో తీవ్రంగా ధ్వజమెత్తుతున్నారు. చంద్రబాబు అధికారం కోసం పగటి కలలు కంటున్నారని, అందుకే పిచ్చి పిచ్చి ప్రయత్నాలు చేస్తున్నారని ఆయన వ్యాఖ్యానించారు. చంద్రబాబు సీమాంధ్రుల కుట్రకు ప్రతినిధి అని, అందుకే అర్థం లేని మాటలు మాట్లాడుతున్నారని వారన్నారు. తెలంగాణ ఏర్పాటు పగటి కల అని కక్కిన చంద్రబాబు విషాన్ని ఎలా భరిస్తున్నారని వారు దేవేందర్, నాగం జనార్దన్ రెడ్డిలను అడిగారు. దేవేందర్ గౌడ్ పై వారు తీవ్రంగా ధ్వజమెత్తారు.

నాగం జనార్దన్ రెడ్డికి ఓసారి దేహశుద్ధి చేసినా చిత్తశుద్ధి రాలేదని వారు వ్యాఖ్యానించారు. మెడలు తిప్పడం కూడా చేతగాని నాగం జనార్దన్ రెడ్డికి కెసిఆర్ విమర్శించే అర్హతం లేదని అన్నారు. తెలంగాణ ఆత్మగౌరవాన్ని తెలంగాణ తెలుగుదేశం నాయకులు చంద్రబాబు పాదాల వద్ద తాకట్టు పెట్టారని వారన్నారు. తెలంగాణ పల్లెల్లోకి పోతే తెలుగుదేశం నాయకులను ప్రజలు బండబూతులు తిడుతున్న విషయం తెలుస్తుందని వారు చెప్పారు. తెలంగాణ ఉద్యమాన్ని ఎదుర్కోలేకనే కెసిఆర్ పై ఏదో రకమైన విమర్శలు చేస్తున్నారని వారన్నారు. ఏదో ఒక రోజు చంద్రబాబు చావుకేక పెడతారని వారన్నారు. చంద్రబాబు చేత శ్రీకృష్ణ కమిటీకి తెలంగాణకు అనుకూలంగా నివేదిక ఇప్పిస్తే తెలుగుదేశం నాయకులకు ప్రజలు బ్రహ్మరథం పడతారని వారన్నారు. తెలంగాణ ఉద్యమానికి పట్టిన తెగులు తెలుగుదేశం పార్టీ అని వారు వ్యాఖ్యానించారు. నాగం జనార్దన్ రెడ్డి ఒళ్లు ఎలా పెరిగిందో తెలంగాణ ప్రజలకు తెలుసునని వారన్నారు. తెలంగాణ ప్రజలపై చంద్రబాబు దాడులు చేయిస్తున్నారని వారు విమర్శించారు.