తెలంగాణ భవన్ ఎదుట కిరోసిన్ పోసుకొని ఒకరి ఆత్మహత్యాయత్నం

హైదరాబాద్: హైదరాబాద్ లోని తెలంగాణ భవన్ ముందు అమరవీరుల కుటుంబానికి చెందిన ఓ వ్యక్తి ఆత్మహత్యకు ప్రయత్నించటం కలకలం రేపింది. వరంగల్ జిల్లా ఐనవోలుకు చెందిన వెంకన్న అనే వ్యక్తి ఆయన భార్యతో పాటు తెలంగాణ భవన్ కు దగ్గర కిరసనాయిలు పోసుకొని ఆత్మహత్యకు ప్రయత్నించాడు. అయితే దీనిని గమనించిన తెరాస నాయకులు కొందరు వెంకన్నను కెసిఆర్ తో మాట్లాడిస్తామని చెప్పి తెలంగాణ భవన్ లోకి తీసుకెళ్లారు.

గతంలో తెలంగాణలో చంద్రబాబు పర్యటన సమయంలో వెంకన్న కొడుకు హరిప్రసాద్ చనిపోయాడు. తెలంగాణ రాష్ట్ర సమితి రెచ్చగొట్టడంవల్లే తన కొడుకు ఉద్యమం వైపు దృష్టి మరల్చాడని, ఇప్పుడు తమకు కొడుకు లేకుండా పోయాడని వారు అంతకుముందు ఆరోపించారు. తమకు సహాయం చేస్తామన్న తెరాస నాయకులు తమకు ఏమీ చేయలేదని, స్థానిక నాయకులను సహాయం కోరి కోరి విసిగి పోయి ఇక్కడకు వచ్చామని చెప్పారు. కెసిఆర్ ప్రతిష్టను దిగజార్చాలనే ఉద్దేశ్యం తమకు లేదని, తమను ఆదుకొమ్మని మాత్రమే వారు కోరుతున్నట్టు చెప్పారు.