వైయస్ జగన్ కు ఎదురు తిరిగిన లగడపాటి రాజగోపాల్

గుంటూరు: తమ పార్టీ కడప పార్లమెంటు సభ్యుడు వైయస్ జగన్ కు తన అండదండలు అందిస్తారని భావించిన కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ మాట మార్చారు. వైయస్ జగన్ కు వ్యతిరేకంగా ఆయన మాట్లాడారు. ముఖ్యమంత్రి రోశయ్యకు అనుకూలంగా మాట్లాడారు. తమ పార్టీ నేత రాహుల్ గాంధీని చూసి వైయస్ జగన్ ఎంతో నేర్చుకోవాలని ఆయన సలహా ఇచ్చారు. 2014 ఎన్నికల్లో పార్టీకి ముఖ్యమంత్రి కె. రోశయ్యనే పార్టీకి నాయకత్వం వహిస్తారని ఆయన శనివారం మీడియా ప్రతినిధుల సమావేశంలో చెప్పారు. రోశయ్యను ఆంధ్రప్రదేశ్ మన్మోహన్ సింగ్ గా ఆయన అభివర్ణించారు.

లగడపాటి రాజగోపాల్ దివంగత నేత వైయస్సార్ కోటరీలో ప్రధానమైన నాయకుడిగా ఉంటూ వచ్చారు. కృష్ణా జలాలను తీసుకుని వెళ్లి పులివెందులలో వైయస్సార్ కు నివాళులు అర్పించారు. వైయస్ జగన్ ఓదార్పు యాత్రను వ్యక్తిగత యాత్రగా ఆ సందర్భంలో చెప్పారు. ఆ మధ్య ఆయన విజయవాడలో సద్భావన యాత్ర నిర్వహించారు. ఈ సందర్భంగా కూడా ఆయన రోశయ్యను ప్రశంసించారు.