గద్దర్ పై విరుచుకుపడిన తెరాస నాయకుడు చంద్రశేఖర్

హైదరాబాద్: తమ పార్టీ అధ్యక్షుడు కె. చంద్రశేఖర రావుపై విమర్శలు చేసిన తెలంగాణ ప్రజా ఫ్రంట్ అధ్యక్షుడు గద్దర్ పై తెలంగాణ రాష్ట్ర సమితి (తెరాస) పోలిట్ బ్యూరో సభ్యుడు, మాజీ మంత్రి ఎ. చంద్రశేఖర్ విరుచుకుపడ్డారు. తెలంగాణ ప్రజా ఫ్రంట్ ను పెట్టింది గద్దర్ కెసిఆర్ ను విమర్శించడానికా, తెలంగాణ రాష్ట్రాన్ని సాధించడానికా అని ఆయన అడిగారు. గద్దర్ లాంటి ఎంత మంది తెలంగాణ రాష్ట్ర సాధన ఉద్యమం చేపట్టడానికి ముందుకు వచ్చినా కెసిఆర్ స్వాగతిస్తారని ఆయన శనివారం మీడియా ప్రతినిధుల సమావేశంలో చెప్పారు.

2004లో తెలంగాణ అంశాన్ని ఐక్య ప్రగతిశీల కూటమి (యుపిఎ) తన ఉమ్మడి కార్యాచరణ ప్రణాళికలో చేర్చిందని, రాష్ట్రపతి ప్రసంగంలో కూడా చేర్చిందని, ఆ ఘనతంతా కెసిఆర్ దేనని ఆయన అన్నారు. కెసిఆర్ ఉద్యమం వల్ల యాభై ఏళ్ల తెలంగాణ ఉద్యమ చరిత్రలో కేంద్ర ప్రభుత్వం తొలిసారి తెలంగాణ రాష్ట్ర ఏర్పాటుకు ప్రక్రియను ప్రారంభిస్తున్నామని ప్రకటించిందని ఆయన చెప్పారు.