చంద్రబాబు నాయుడు శాడిస్టు కామెంట్ ను తప్పు పట్టిన చిరంజీవి

తిరుపతి: ప్రధాని డాక్టర్ మన్మోహన్ సింగ్ ను తెలుగుదేశం పార్టీ అధ్యక్షుడు నారా చంద్రబాబు నాయుడు శాడిస్టుగా అభివర్ణించడాన్ని ప్రజారాజ్యం పార్టీ అధ్యక్షుడు చిరంజీవి తప్పు పట్టారు. ప్రధానిని చంద్రబాబు శాడిస్టుగా వ్యాఖ్యానించడం హుందాగా లేదని ఆయన అన్నారు. తిరుపతి పర్యటనకు వచ్చిన ఆయన గురువారం ఉదయం మీడియా ప్రతినిధులతో మాట్లాడారు. మెక్రో ఫైనాన్స్ సంస్థల కట్టడికి రాష్ట్ర ప్రభుత్వం జారీ చేసిన ఆర్డినెన్స్ పై ఆయన అసంతృప్తి వ్యక్తం చేశారు. నమోదైన కంపెనీలను నియంత్రించడానికి ఆ ఆర్డినెన్స్ కొంత మేరకు ఉపయోగపడుతుంది తప్ప బాధితులకు సహాయం చేసే విధంగా లేదని ఆయన అన్నారు.

సూక్ష్మరుణ సంస్థల వద్ద తీసుకున్న రుణాలన్నింటిపైనా ఏడాదిపాటు మారిటోరియం విధించాలని ప్రజారాజ్యం పార్టీ అధినేత చిరంజీవి ప్రభుత్వాన్ని కోరారు. మైక్రోఫైనాన్స్‌ సంస్థలను అరికట్టేందుకు ఆర్డినెన్స్‌ తీసుకొచ్చినప్పటికీ అందులో వడ్డీ రేట్ల నియంత్రణపై ఎలాంటి పరిమితీ లేదని ఆయన అన్నారు. ఈ విషయంలో ముఖ్యమంత్రి కేంద్ర ప్రభుత్వంపై ఒత్తిడి తీసుకురావాలని కోరారు. రాష్ట్రంలో వరి దిగుబడులు బాగానే ఉన్నా నిల్వ చేసుకొనే గోదాములు లేక రైతులకు సరైన ధర దక్కడం లేదని చెప్పారు. ఈ విషయంపై ప్రధానికి తాము విజ్ఞప్తి చేస్తామని ఆయన చెప్పారు. తిరుమల తిరుపతి దేవస్థానం (టిటిడి) పాలక మండలిని రాజకీయాలకు అతీతంగా నియమించాలని ఆయన అభిప్రాయపడ్డారు.

తిరుపతి, విశాఖపట్నం, విజయవాడ ప్రాంతాల్లో హైకోర్టు బెంచ్ లు ఏర్పాటు చేయాలని చిరంజీవి కోరారు. హైకోర్టు బెంచ్ ల కోసం న్యాయవాదులు చేస్తున్న ఆందోళనకు ఆయన మద్దతు ప్రకటించారు.