డిసెంబర్ తదుపరి పరిణామాలపై సిఎం ఎదుట పారిశ్రామికవేత్తల టెన్షన్

హైదరాబాద్: డిసెంబర్ తదనంతర పరిణామాలపై ముఖ్యమంత్రి కె. రోశయ్య ఎదుట పారిశ్రామికవేత్తలు తీవ్ర ఆందోళన వ్యక్తం చేశారు. గురువారం జరిగిన భారత పారిశ్రామికవేత్తల సమాఖ్య (సిఐఐ) దక్షిణాది సదస్సులో ఇది చోటు చేసుకుంది. వారికి ముఖ్యమంత్రి సర్ది చెప్పే ప్రయత్నాలు చేశారు. రాష్ట్ర పరిస్థితిపై శ్రీకృష్ణ కమిటీ నివేదిక సమర్పించిన తర్వాత రాష్ట్రంలో తలెత్తే పరిణామాలపై పారిశ్రామికవేత్తల్లో టెన్షన్ వ్యక్తమైంది. ఆ టెన్షన్ అక్కరలేదని ముఖ్యమంత్రి కె. రోశయ్య చెప్పారు. ఆ విషయం ప్రభుత్వం దృష్టిలో ఉందని, ముందస్తు జాగ్రత్తలు తీసుకుంటామని ఆయన చెప్పారు.

డిసెంబర్ తర్వాత సంభవించే పరిణామాలపై నెలకొన్న ఆందోళనకరమైన పరిస్థితిని కేంద్రం దృష్టికి కూడా తీసుకుని వెళ్లామని ఆయన చెప్పారు. తెలంగాణ అంశం వీధుల్లో తేలేది కాదని ఆయన అన్నారు. తెలంగాణపై కేంద్రం నిర్ణయం తీసుకుంటుందని ఆయన చెప్పారు. శ్రీకృష్ణ కమిటీ డిసెంబర్ 31వ తేదీన గానీ ఈ లోపల గానీ కేంద్రానికి నివేదిక సమర్పించే అవకాశం ఉందని ఆయన అన్నారు.