తెలంగాణ ఉద్యమానికి కె చంద్రశేఖర రావు స్టూడెంట్ ఫోర్స్

హైదరాబాద్: తెలంగాణ ఉధ్యమ ఉధృతికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఫోర్స్ ను తయారు చేస్తున్నారు. తెలంగాణపై శ్రీకృష్ణ కమిటీ నివేదిక వచ్చిన తర్వాత ఉద్యమాన్ని ఉధృతం చేసేందుకు తెలంగాణ రాష్ట్ర సమితి విద్యార్థి విభాగం(టీఆర్ఎస్వీ) ప్రణాళిక సిద్ధం చేసింది. బుధవారం తెలంగాణ భవన్‌లో టీఆర్ఎస్వీ నూతన కార్యవర్గ సమావేశం జరిగింది. టీఆర్ఎస్ అధినేత కేసీఆర్ హాజరైన ఈ సమావేశ వివరాలను టీఆర్ఎస్వీ అధ్యక్షుడు సుమన్ మీడియాకు వెల్లడించారు. డిసెంబర్‌లో శ్రీకృష్ణ కమిటీ నివేదిక వచ్చిన తర్వాత ఉద్యమాన్ని ఉధృతం చేసేందుకు టీఆర్ఎస్వీని మరింత బలోపేతం చేయాలని నిర్ణయించామన్నారు. దానిలో భాగంగా 15 లక్షల మంది విద్యార్థులతో గులాబి దళాన్ని ఏర్పాటు చేయనున్నట్లు తెలిపారు. టీఆర్ఎస్వీలో ప్రస్తుతం 8 లక్షల మంది సభ్యులు ఉన్నారని, మరో 7 లక్షల మంది విద్యార్థులను చేర్పించే ప్రణాళిక రూపొందించామన్నారు.

గురువారం నుంచి నవంబర్ 4 వరకు తెలంగాణలోని 119 నియోజకవర్గాల్లో సభ్యత్వ నమోదు కార్యక్రమాన్ని చేపడతారు. నవంబర్ 4 తర్వాత నియోజకవర్గ స్థాయిలో శిక్షణా తరగతులను నిర్వహించి, అనంతరం జిల్లా, రాష్ట్ర స్థాయిలో సదస్సులు ఏర్పాటు చేస్తారు. 15 లక్షల మంది గులాబి దళంతో డిసెంబర్ తర్వాత సునామీ సృష్టిస్తామని సుమన్ చెప్పారు. కాగా, తెరాసను బలోపేతం చేయడానికి గురువారం నుంచి పల్లెబాట కార్యక్రమం జరుగుతోంది. కరీంనగర్ జిల్లా జగిత్యాల పల్లెబాట కార్యక్రమంలో కెసిఆర్ పాల్గొంటారు.