యడ్యూరప్పకు ఊరట: రెబెల్ ఎమ్మెల్యేలపై వేటు సబబేనన్న హైకోర్టు

బెంగళూర్‌: కర్ణాటక ముఖ్యమంత్రి యడ్యూరప్పకు ఊరట లభించింది. 11 మంది శాసనసభ్యులపై స్పీకర్ వేటు వేయడం సరైందేనని హైకోర్టు మూడో న్యాయమూర్తి శుక్రవారం తీర్పునిచ్చారు. తిరుగుబాటు శాసనసభ్యులపై వేటును ఇంతకు ముందు ఇద్దరు న్యాయమూర్తుల్లో ఓ న్యాయమూర్తి సమర్థించగా, మరో న్యాయమూర్తి వ్యతిరేకించారు. దీంతో ముగ్గురు న్యాయమూర్తుల్లో ఇద్దరు న్యాయమూర్తులు స్పీకర్ నిర్ణయాన్ని సమర్థిస్తూ తీర్పునిచ్చారు. ఈ తీర్పుతో కర్ణాటక రాజకీయ సంక్షోభం ముగిసినట్లేనని భావిస్తున్నారు.

బిజెపి తిరుగుబాటు శాసనసభ్యులను స్పీకర్ కెజి బోపయ్య సస్పెండ్ చేయడం రాజ్యాంగం పదో షెడ్యూల్ లో గల పేరా 2(1)కి అనుగుణంగా ఉందని జస్టిస్ సభాహిత్ అభిప్రాయపడ్డారు. దీంతో యడ్యూరప్ప నేతృత్వంలోని బిజెపి ప్రభుత్వానికి ముప్పు తప్పినట్లేనని భావిస్తున్నారు. ఈ తీర్పుతో బిజెపి వర్గాలు ఊపిరి పీల్చుకున్నాయి.