శ్రీకృష్ణ కమిటీ నివేదికను బట్టే తెలంగాణపై నిర్ణయం: చిదంబరం

న్యూఢిల్లీ: శ్రీకృష్ణ కమిటీ నివేదికను బట్టే తెలంగాణపై తాము నిర్ణయం తీసుకుంటామని కేంద్ర హోం మంత్రి పి. చిదంబరం అన్నారు. దేశంలోని శాంతిభద్రతలపై వివరించడానికి ఏర్పాటు చేసిన మీడియా ప్రతినిధుల సమావేశంలో సోమవారం వచ్చిన ప్రశ్నలకు సమాధానాలు ఇస్తూ ఆయన ఆ విషయం చెప్పారు. శ్రీకృష్ణ కమిటీ ఆంధ్రప్రదేశ్ పరిస్థితిపై తగిన సమయంలో నివేదిక ఇస్తుందని, ఆ నివేదికను బట్టి తాము నిర్ణయం తీసుకుంటామని ఆయన అన్నారు. డిసెంబర్ 31వ తేదీలోగా శ్రీకృష్ణ కమిటీ నివేదిక సమర్పిస్తుందని ఆయన చెప్పారు.

రాష్ట్ర ప్రభుత్వం కోరితే ఆంధ్రప్రదేశ్ కు అదనపు బలగాలను పంపించడానికి సిద్ధంగా ఉన్నామని ఆయన చెప్పారు. డిసెంబర్ తర్వాత శాంతిభద్రతల సమస్య తలెత్తవచ్చుననే అనుమానాల నేపథ్యంలో చిదంబరం ఆ విషయం చెప్పినట్లు భావిస్తున్నారు. దీనిపై తెలంగాణ రాష్ట్ర సమితి (తెరాస) శాసనసభ్యుడు హరీష్ రావు తీవ్రంగా ప్రతిస్పందించారు. తెలంగాణ ఉద్యమాన్ని బలగాలతో ఆపలేరని, ఇది ప్రజల గుండెల్లోంచి పుట్టిన ఉద్యమమని ఆయన అన్నారు. గతంలో కూడా పోలీసు బలగాలతో ఉద్యమాన్ని అణచివేయలేకపోయారని ఆయన గుర్తు చేశారు.