సిఎంగా జైపాల్ రెడ్డిని పంపిస్తారనే వార్తలను కొట్టిపారేస్తున్న ఎఐసిసి

న్యూఢిల్లీ: ముఖ్యమంత్రిని మారుస్తారని వస్తున్న వార్తలను ఎఐసిసి వర్గాలు ఖండిస్తున్నాయి. అవన్నీ ఊహాగానాలేనని కొట్టిపారేస్తున్నాయి. రాష్ట్రంలో ముఖ్యమంత్రి మార్పుపై వస్తున్న వార్తలన్నీ ఊహాగానాలేనని ఏఐసీసీ అధికార ప్రతినిధి షకీల్ అహ్మద్ చెప్పినట్లు ఓ ప్రముఖ దినపత్రిక రాసింది. రాష్ట్ర ముఖ్యమంత్రి రోశయ్యను మార్చి పగ్గాలను కేంద్ర పట్టణాభివృద్ధి మంత్రి ఎస్. జైపాల్‌రెడ్డికి ఇవ్వడానికి కాంగ్రెస్ అధిష్టానం సిద్ధమైనట్టు వస్తున్న వార్తలను ఆయన తోసిపుచ్చారు.

కేంద్ర మంత్రి జైపాల్ రెడ్డిని రాష్ట్రానికి పంపిస్తున్నట్లు అధిష్టానం నుంచి ఆ మేరకు తమకైతే ఎలాంటి సమాచారమూ లేదన్నారు. అలాంటిదేమన్నా ఉంటే తమకు తప్పకుండా సమాచారమిస్తారని ఆయన చెప్పారు. ముఖ్యమంత్రులైనా కేంద్రమంత్రులైనా ఎవరు ఎక్కడుండాలనేది నిర్ణయించేది కాంగ్రెస్ అధిష్టానమని, అలా నిర్ణయించినపుడు దానికి సంబంధించిన సమాచారాన్ని తప్పకుండా మీడియాకు తెలియజేస్తామని ఆయన తెలిపారు.